Demokraatit: Nerrivimmi issiaqataarusunneruvugut
Demokraatit suli aalajangiusimavaat Folketingimit saamerliit talerperliilluunniit pituttorfiginiannginnamikkit. Erseqqissumilli nalunaarutigaat Atlantikup avannaamiut suleqatigiiffiannut DNAG-mut toqqaannartumik ilaasortaalersaannginnertik Folketingimut qinigaatitaqassagaluarunik.
- Isumaqarpugut Folketingimi sunniuteqarnissamut allanik periarfissarpassuaqartoq, Ane Lone Bagger Demokraatit sinnerlugit Folketingimut qineqqusaartoq oqarpoq.
- Isumaqarpugut DNAG qinigaaffimmi qaangiuttumi sunniuteqarpiarsimanngitsoq. Uagut nunanut allanut ataatsimiititaliami toqqaannartumik ilaasortaanissaq ornigineruarput taamalu issittumi sillimaniarneq upalungaarsimanerlu eqqartorneqartillugit toqqaannartumik sunniuteqarnissaq orniginartinnerugatsigu. Ilimanarpormi uuliasiorneq annertusiartortillugu apeqqutit tamakku suli takkussornerulerumaartut, Ane Lone Bagger KNRimut taama oqarpoq.
Taamaattoq Atlantikup avannaamiut suleqatigiiffiata suleqatiginissaa ammaffiginerarpaa taamaattorli toqqaannartumik ilaasortaanissaq ersarissumik naaggaarlugu.
Atassutikkulli Siumukkuttut Demokraatitullu toqqaannartigisumik itigartitsinngillat.
- Misissorusupparput Atlantikup avannaamiut suleqatigiiffianni ilaasortaanerup suut pitsaaqutigisinnaanerai. Kisianni tassa maannangaaq oqaatigisinnaanngilarput toqqaannartumik ilaasortanngorniarnerluta, Hans Lyberth Atassut sinnerlugu Folketingimut qineqqusaartoq oqarpoq.
Isummerniarnerminni namminersulivinnissamut apeqqut misissoqqaarniarpaat.
- Atlantikup avannaani suleqatigiit piaarnerpaamik namminersulivinnissarput ujartorpaat. Uagulli tamanna nukinngutiginngilarput suut iluarsineqaqqaartariaqartut misissoqqaarniaratsigu, Hans Lyberth KNRimut oqarpoq.
