Demokraatit napparsimalluni sulinngitsoortarnerit annikillisinniarlugit suliffik sivikinnerulersinniarpaat

Sapaatip akunnerani suliffiup sivikinnerulernera piffissami sivisunerusumi isumaqarluarsinnaava?

Tamanna Inatsisartuni ilaasortat ataasinngorpat ukiaanerani ataatsimiinnerminni eqqartussavaat.

Demokraatini ilaasortap Anna Wangenheimip tamanna sammisassatut qaqippaa. Taanna isumaqarpoq suliffiup sivikillinerata inuit sulerusunnerulernerannik napparsimanikinnerulernerannillu kinguneqaratarsinnaasoq.

Ullumikkut nunatsinni napparsimalluni sulinngitsoornerit annertuallaarujussuarput, Anna Wangeheim naliliivoq.

- Takuneqarsinnaavoq nunatsinni atorfillit qallunaat nunaanni sanilliullugit napparsimakulasarnerat annertunerusoq.

- Taannalu isumaqarfigivara annertuallaartoq, arlaatigut iliuuseqarfigissagutsigit sammivik qanoq isikkoqarsinnaanera tunngavigalugu Inatsisartunut aalajangiisartunut eqqutissallugu eqqarsaatersuutigisimavara, Anna Wangenheim oqarpoq.

Kalaallit Nunaanni cetraladministrationimi napparsimanerit amerlanerupput

Kisitsisit 2018-imeersut takutippaat centraladministrationimi agguaqatigiissillugu napparsimalluni sulinngitsoornerit tamakkerlugu atorfilittani akunnerit 101,2-jusut.

Demokraatit assersuutigisaanni Danmarkimi taamani akunnerit 91,2-upput. Nikinganeq Anna Wangenheimip ingasagivaa.

Taamaammat eqqartortikkusuppaa sapaatip akunnerani suliffiup akunnernik pingasunik Danmarkimisut ilanngarneqarnissa.

AAMMA ATUARUK Microsoftimi sulisut naammassisaqarluarnerusut

- Isumaqarama nunani allani misilittakkat aallaavigalugit takussutissaqarluartoq, sapaatip akunnera sulisinnaaneq sulinermullu akunnerni appaanermi takussutissartarigaa napparsimakulasarnerit ikiliartortartut, Anna Wangenheim oqarpoq. 

- Taamatullu sulisut ilorrisimaarnerullutik sullarinnerullutillu atorfimminnut tunniussaqarsinnaasartut.

Allannguinermili aningaasat sumit aaneqassanersut Anna Wangenheim siunnersuutissaqanngilaq. ”Amerlassaqisut” nassuerutigaa, illua tungaanili iluaqutissartai annertussanerarlugit.

Napparsimalluni sulinngitsoornerit akisupput

Demokraatilli napparsimalluni sulinngitoortarnerit kisiisa maluginianngilaat.

Isumaginninnermut Suliffeqarnermullu Naalakkersuisup Mimi Karlsenip IA-meersup oqallinnissamut allakkiamini maluginiarnerarpaa, napparsimalluni sulinngitsoortarneq assut ajornartorsiutaasoq.

Eqqaavaattaaq siusinnerusukkut misissuinerit takutikkaat napparsimalluni sulinngitsoortarnerit Kalaallit Nunaannut akisusoq.

- Tamanna aamma suliffeqarfimmut napparsimalluni sulinngitsoornermut eqqugaasumut aningaasatigut sunniuteqarpoq aammalu minnerunngitsumik timikkut/tarnikkut atukkanut, tassami suleqatit sulinerujussuusariaqarput, napparsimasoqarnerani, tamannalu sulisunut aamma nungullarsaasarpoq, naalakkersuisoq akivoq. 

Atorfeqartunullu nungullarsaataasinnaanera ilanngullugu eqqaavaa.

Islandimi ullut suliffiit sisamat

Sapaatip akunnerani ullut suliffiit sisamat Islandimi ukiuni arlalinni misilerarneqarnikuuvoq. Ima iluatsissimatigaaq allaat sulisut amerlanersaat annikinnerusumik sulisalersimallutik.

Tuluit Nunaanni isummersuiffik Autonomy Islandimilu piujuartitsinissami peqatigiiffik inernerinut malinnaasimapput. Suliaallu ukioq manna saqqummiunneqarpoq.

AAMMA ATUARUK Islandimi sapaatit-akunneranut ulluni sisamani sulisarnissamik misileraaneq iluatsilluartoq

Misissuinerit takutippaat suliffeqarfiit peqataasut amerlanersaanni  naammassisat allannguuteqanngitsut, ilaannili qaffariarsimallutik.

Sapaatip akunnerani suliffik sivikinnerusoq siullermik nunatsinni eqqartorneqanngilaq. Assersuutigalugu Sapaatip akunnerani akunnerit 37,5-inut appartinnissaannut Siumut qineqqusaaruteqarpoq.