Islandimi sapaatit-akunneranut ulluni sisamani sulisarnissamik misileraaneq iluatsilluartoq
Islandimi sapaatit-akunneranut ulluni sisamani sulisarnissamik misileraaneq ima iluatsissimatigaaq, Islandimi sulisartut amerlanersaat sapaatit-akunneranut sivikinnerusumik sulilersimallutik.
Tuluit isummersuisit Autonomy, Islandimilu tamat oqartussaaqataanerannik pingaarnertut suliniutilik nalunaarusiortuusut, BBC allappoq.
2015-ip 2019-illu akornanni misileraasoqarpoq. Sulisut tassani sapaatit-akunnerata ingerlanerani akissarsiaat allanngortinneqaratik sivikinnerusumik sulisalernissaat misileraaffigineqarput.
Suliffeqarfiit misileraanermi peqataasut akornanni amerlanerit naammassisaqarsinnaassusiat tamaaginnarpoq, ilaallumi naammassisaqarluarnerulerlutik.
Islandimi naalakkersuisut, Reykjavikimilu aqutsisut misileraatitsisuupput, sulisut 2500-t sinnerlugit peqataallutik.
AAMMA ATUARUK Microsoftimi sulisut naammassisaqarluarnerusut
Sulisartut misileraanermi uippakajaannginnerulernerannik nukissaqarluarnerunerannillu kinguneqartoq, immikkut ilisimasallit misileraatitsisut oqaatigaat. Sulisut amerlasuut peqqinnerulertutut aamma misigisimapput, sulinerullu sulinngiffeqarnerullu oqimaaqatigiinnerusutut misigineqarlutik.
Islandimi suliatigut peqatigiiffiit annerit tamanna pillugu akissarsiat sulinermilu atukkat pillugit nutaamik maanna isumaqatigiissusiornialerput, Islandimilu sulisut 86 procentii sapaatit-akunneranut akissarsiaat allanngortinneqaratik sivikinnerusumik sulilernerannik kinguneqarpoq, imaluunniit taama sulisinnaanngornissamut pisinnaatitaaffeqalerlutik.
