Microsoftimi sulisut naammassisaqarluarnerusut

Sapaatit-akunnerani ataatsimi ulluni sisamani sulisarneq, qarasaasialeriffissuup Microsoftip Japanimi allattoqarfimmini misileraaffigeqqammerpaa.

Misileraaneq iluatsilluarpoq. Sulisummi nuannaarneruliinnaratik aamma naammassisaqarluarnerupput.

Aviisi The Guardian taama allaaserisaqarpoq.

Aggustimi misileraasoqarpoq, Microsoftillu Japanimi sulisui katillugit 2300-t missaanniittut misileraanermi tallimanngornerit tamaasa sulisanngillat. Ullunilu tallimani sulisarnermissut akissarsiaqartitaapput.

Sapaatit-akunnerani ataatsimi misileraalluni sivikinnerusumik sulineq pissutsit assigiinngitsutigut pitsaanerulernerannik kinguneqarpoq. Ataatsimiinnerit pissarsiffiulluarnerusut sulisullu naammassisaqarsinnaassusiat 40 procentinik annertuseriartoq, Microsoftip misileraanerup kingorna nalilerpaa.

Sulineq 20 procentinik sivikillineqartoq

Sulisut misileraanerup nalaani sulinerminni unillatsiartarnertik 25 procentinik sivikillivaat.

- Ilikkakkatit amerlisikkusukkukkit sivikinnerusumik sulisarit qasuerserluartarlutillu, Microsoftip Japanimi pisortaa, Takuya Hirano, nalunaarummi qarasaasialeriffissuup Japanimi immikkoortortaqarfiata nittartagaani saqqummiussami taama oqarpoq.

- Allattoqarfitsinni sulisut 20 procentinik sivikinnerusumik sulinerminni nalinginnaasumik sulinermisulli qanoq iliornermikkut naammassisaqarsinnaalluarsinnaanertik isumaliutigissagaat neriuutigaara.

Sulisut amerlanerussuteqartut - tassa 92 procentii - sapaatit-akunnerani sivikinnerusumik sulinertik nuannaralugu misileraanerup kingorna oqaatigaat.

Eqaannerusumik suleriuseqartitsinerit iluaqutaassasut

Atortussanik innaallagiamillu atuinerit aamma annikillisut Microsoftip Japanimi immikkoortortaqarfiata nalilerpaa. Allattoqarfiit tallimanngornikkut inoqartanngimmata innaallagissamik atuineq sisamararterummik annikillivoq, pappialartornerlu affaannanngorneranik kinguneqarluni.

Microsoft ukioru misileraaqqissamaartoq nutaarsiassaqartitsiviup AFP-ip allaaseraa.

Suliffeqarfiit eqaannerusumik suleriuseqartitsinissaat Japanip naalakkersuisuisa kaammattuutigereeraallu Microsoft misileraavoq.

Tamannalu Japanimi inuit sulerulullutik toqusartut amerliartornerisa - Japanimiut "karoshi"-mik taasagaat - akiornissaanut iluaqutaassaaq.

Odsherred Kommune Danmarkimi pisortat suliffeqarfiutaanni siullersaalluni sapaatit-akunnerani sivikinnerusumik sulinermik atuutilersitsivoq.

Tamanna ukiuni pingasuni misileraasoqareersorlu pivoq. Tamanna ilutigalugu innuttaasut innuttaasunik sullissiviup ulluinnarni nalinginnaasumik ammassarfiata kingorna saaffiginnissinnaanngorput.