Demokraatit meeqqat pillugit isummersuisinik pilersitserusupput
Nunatsinni meeqqat inuusuttullu sumiginnagaasut pillugu piffissami kingullermi oqallittoqangaatsiarpoq, Demokraatillu isumaqarput maanna piffissanngortoq maannamut naleqqiullugu sakkut allaanerusut atorneqartariaqalersut, taassungalu atatillugu isummersuisinik pilersitsisoqartariaqartoq Demokraatit tusagassiuutinut nalunaarummi ilaatigut allaaseraat.
- Pisortat kisimik ajornartorsiut aaqqissinnaanngilaat, oqartariaqarpugullu pisortat, kommuniugaluarpata Namminersorlutik Oqartussaagaluarpataluunniit piumassuserinngisaminnik akisussaaffitsik sumiginnarmassuk, aamma malunnarpoq meeqqanut inuusuttunullu tunngatillugu suliassat immikkoortut kisimiilluta artorigut, Demokraatit ilaatigut taama allaaserisaqarput.
Politikerinit, partiini tamaneersunik, kattuffinniillu namminersortunit meeqqanik inuusuttunillu sullissisunit, kiisalu kommuninit allaniillu peqataaffigineqartunik isummersuisinik taamaammat pilersitsisoqartariaqartoq Demokraatit isumaqarput:
- Immikkoortuni arlalinnik aporfeqarpoq avaqqukkuminaatsunik, ilaatigut inissiivissaaleqinerit, sullissisut artornartunik suliallit paarlakaajaanneri, nunami tamarmi ilaqutariinnut sullissivinni sulisussaaleqineq imaaliallaannaq aaqqinneqarsinnaanngitsunik, tusagassiuutinut nalunaarummi taama ilaatigut allaaserisaqartoqarpoq, nangillutillu:
- Taamaattumik meeqqat inuusuttullu pillugit eqqarsartariaqarpugut pisortani amigaatigigatsigit iliuusissanut periarfissat arlallit, Demokraatit allapput.
Ajornartorsiutinut ilaatigut malinnaasinnaasoqannginnera eqqarsaatigalugu Demokraatit isumaqarput ajornartorsiutit takkuttut tulleriiarlugit iluarsinneqarnissaat isumaqatigiissutigineqarsinnaasoq.
