Demokratiit isornartorsiuisut: Aaja Chemnitz Folketingimi naammassisaqarnerarpallaarpoq
Nakutitsineruvoq.
Tassa Folketingimi ilaasortap IA-meersup, Aaja Chemnitzip, nunatsinnut aningaasaliissutaasimasut amerlassusaannut tunngasunik oqallinnerni, Facebookimi aamma Folketingimi Inuit Ataqatigiit nittartagaanni saqqummiisaarnera, Folketingimut qinigassanngortittut ilaata Demokraatineersup, Anna Wangenheimip, nakutitsinerunerarpaa.
Aaja Chemnitzip oqarnera naapertorlugu IA naalagaaffiup katillugit 3,2 milliardit koruuninik nunatsinnut qinigaaffimmi matumani aningaaliissuteqarsimaneranik toqqaannartumik toqqaannanngitsumilluunniit qulakkeerisuuvoq.
Aaja Chemnitzilli imminut taama nersorniarnera nakutitsinerusoq, Anna Wangenheim isumaqarpoq. Demokraatit nittartakkaminni taama aamma allapput.
- Nakutitsinerusoraarput, partiinimi sinnerlugu ilaasortatullu Folketingimi qanoq naammassisaqarsimatiginerminik imminut nersorniarnera nakutitsinerusoraarput. Eqqoqqissaanngilarlu. Taamaammat tamanna tamanut paasititsiissutigerusupparput.
Aaja Chemnitz: Qulakkeerineq toqqaannanngitsuunersoq toqqaannartuunersorluunniit apeqqutaanngilaq
Folketingi Tunumi meeqqanik inuusuttunillu ikiorsiinermut atugassatut 80 millionit koruuninik 2019-imi aningaasaliivoq. Taakkulu 3,2 milliardit koruunit ilagigaat, Aaja Chemnitz oqarpoq.
Tamannali ilumuunngitsoq, Anna Wangenheim isumaqarpoq. Taassumami oqarnera naapertorlugu Inatsisartut tamarmiusut Folketingi Tunumi isumaginninnermi ikiortiseraat. Aaja Chemnitzillu naammassisanik amerlassusiliinera qinersisartunut ileqqorluttuliornerulaarnerusoq, Anna Wangenheim isumaqarpoq.
- Taamaaliornera imminut nersorneruallaarsorigatsigu nakutitsinerunertut taavarput. Folketingimmi taama amerlatigisunik aningaasaliissuteqarnissaa Inatsisartuni amerlanerussuteqarluartut Naalakkersuisullu suleqatigiinnerisigut qulaakkeerneqarpoq.
Imminulli nersorniarpallaarsimanani, Aaja Chemnitz isumaqarpoq. Demokraatilli Folketingip 80 millionit koruuninik immikkut aningaasaliissuteqarnera sumik aallaaveqarpiarnersoq puigorsimagaat, taanna isumaqarpoq.
DR-immi Tasiilaq pillugu piviusulersaarusiaa "Byen hvor børn forsvinder" aallakaatinneqareersorlu, Naalakkersuisut Tasiilami meeqqanut inuusuttuniulu ikiuunnermut Danmarkimik ikiortiserinninnissaannik Inuit Ataqatigiit piumasaqaqqaartuupput.
AAMMA ATUARUK Avataanit ikiorneqarnissaq pisariaqanngilaq
Isumaginninnermulli taamani naalakkersuisoq Siumumeersoq, Martha Abelsen, taamaalioqqusinngilaq. Taannali taamani Inatsisartunit partiiminillu isornartorsiorneqarpoq, tamannalu tassa Naalakkersuisut naalagaaffimmik ikiortiserinneqquneqarneranik kinguneqarpoq.
Folketingimilu isumaqatigiinniaqataasimalluni Folketingillu taama amerlatigisunik nunatsinnut immikkut aningaasaliinissaa danskit naalakkersuisuinit akerlerineqaqqaarsimagaluartoq taamaaliornermut qulakkeerisooqataasimalluni, Aaja Chemnitz oqarpoq.
- Taamammi amerlatigisunik aningaasaliissuteqanngitsuungajapput. Danskimmi partiivisa aningaasaliissutissat amerlavallaarujussuarnerarpaat, alaatsinaattuuinnartitaagaluartugullu taama amerlatigisunik aningaasaliissuteqarnerannik isumaqatigiinniaqataanitsinni uanga oqaaseqarnera qulakkeerisooqataavoq, Aaja Chemnitz oqarpoq.
Aaja Chemnitzillu 1,5 milliardit koruuninik aningaasaliinertalimmik Issittumi piginnaasanik annertusaanermik taallugu Issittumi nakkutilliinerunissamik isumaqatigiissuteqarneq aamma pillugu imminut nersorniarsarinera aamma nakutitsinerusoq, Demokraatit isumaqarput.
Naalakkersuisut naalagaaffillu tamanna pillugu siorna isumaqatigiipput. Tassa Folketingimi IA taamaaliornermut qulakkeerisuunngilaq, Anna Wangenheim oqarpoq.
AAMMA ATUARUK Danmarkip nunattalu illersornissamut isumaqatigiissut allannguuterpassuaqanngitsumik isumaqatigiissutigigaat
- Qulakkaarisooqataasummi nunatsinniipput, tassaasut nunatta inui, Naalakkersuisut Inatsisartullu.
Danskilli illersornissamut ministeriallu, tassa Morten Bødskovilu, isumaqatigiittoqartinnagu ataatsimiissimallutik, tamatumanilu ilaatigut illersornissamut nunatsinni ilinniarfiliornermut aningaasaleeqqusisimalluni, Aaja Chemnitz ilisimatitsivoq. Tamanna IA-p illersornissamut tunngatillugu siunnersuutaani aamma atuarneqarsinnaavoq. Illersornissamullu ilinniarfiliornissaq inaarutaasumik isumaqatigiissummut ilanngunneqarpoq.
- Taamaammat IA Issittumi piginnaasanik annertusaaniarnermi isumaqatiissummut iliuusissanik tigussaasunik ilanngusseqataalluinnarpoq, Aaja Chemnitz oqarpoq.
Politikkimi sutigut tamatigut amerlanerussuteqarnissaq pisariaqarpoq
“Aaja IA-lu aningaasaliisoqarneranik qulakkaarisooqataasimasut”, IA-p nunarput naalagaaffimmit 3,2 milliardit koruuninik aningaasaliiffigineqarsimaneranut sunniuteqaqataasimanerarluni allagaani arlalinni allaqqavoq. Aammali “Aaja nukingisaarisarsimasoq” allagaata ilaanni allaqqavoq.
Taamatulli oqarnerat partiit allat aningaasaliiffigineqarnissatsinnik qulakkeerisooqataasimannginerannik ersersitsinerusinnaasoq, Anna Wangenheim oqarpoq. Tamannalu Inatsisartunik Naalakkersuisunillu suliarpassuarnik naammassinneqataasimasunik ersoqatiginninnginnerusoq, taanna isumaqarpoq.
Folketingimilu ilaasortaqatiminik Siumumeersumik, Aki-Matilda Høegh-Damimik, suliarpassuarni aamma sunniuteqaqataasimasumik aamma ersorinnginnerusorinerarpaa.
- Tapersersoqatigiinnitsinnik ersersitsinnginnerat naapertuilluanngitsuliorneruvoq, Anna Wangenheim oqarpoq.
IA-lli nunatsinnut aningaasaliisoqarnissaanik kisimi qulakkeerisuunnginnera erseqqittoq, Aaja Chemnitz oqarpoq.
- Politikkimi sutigut tamatigut amerlanerussuteqarnissaq pisariaqartoq poltikkimik paasisimasaqalaaginnartulluunniit ilisimavaat, taanna KNR-imut oqarpoq.
Folketingimi isumaqatigiinniarnerit avaliini danskit ministeriinut partiivinullu sunniiniarneq sulinerup ilarujussuarigaa, tamannalu ingammik ilaasortanut nunat avannarlerneersunut atuuttoq, taassuma erseqqissaatigaa.
- Isumaqatigiinniarnerit ilarpassui, aamma nunatsinnut tunngasut, matoqqasuusarmata aalajangiinissani arlalippassuartigut suli qaangiinnagaasarpugut, Aaja Chemnitz oqarpoq.
Isumaqatigiinniarnernilli toqqaannartumik toqqaannanngitsumillu peqataaffigisimasannik immikkoortitsisinnaannginnerit qinersisartunut nakutitsiniarnerunnginnerpa?
- Naamerluinnaq taamaattoqanngilaq. Pingaartitavulli naammassisaqaqataaffigisavullu ammasumik isertuaatsimillu saqqummiukkivut isumaqarpunga, Aaja Chemnitz oqarpoq.
Taassuma partiit allat naammassisaqaqataaffigisaminnik qinersisartunut saqqummiinissaannik kaammattorpai.
