Demokraatit: KNR 10 millionit koruuninik tunineqaqqilli
Anda Uldum aningaasaliissutit ilaneqarnissaannik siunnersuuteqarpoq Inuit issittortormiut siunnersuisoqatigiivinut ICC-mut aningaasaliissutit nuunnerisigut. Taakku 5 millionit koruuninik tapiiffigineqartarput. 5 millionit tullii puisit amiinik tunisinermut tapiissutit 26 millionit koruunisut 21 millionit koruuninut ilanngarnerisigut aaniarpai.
- Nalunngilluinnarpara siunnersuutigaa arlalinnit isornartorsiorneqarumaartoq. Kisianni maannamut tusarparput tamatta isumaqatigigipput KNR-imut aningaasaliissutit amerlineqartariaqartut kisianniliuna suli oqartoqanngitsoq aningaasat sumit aaneqassanersut. Uagut taamaasiorpugut. Tassami ICC naalakkersuisutigoortuunngitsumik suliniaqatigiiffittut taaneqartarpoq taamaammat pisortanit tapiiffigineqaratik ingerlasariaqarput. KNAPK aamma isumaqataanavianngilaq, kisianni puisit amiinik nioqquteqarneq taama annertutigisumik tapertuaannarsinnaanngilarput. Tassami puisit amii tunineqarsinnaanatik quersuarniiginnartarput taamtullu uninngasut amerlapput, Anda Uldum KNR.gl-imut oqarpoq.
Naalakkersuisooqataasa IA-kkut Demokraatit siunnersuutaat isumaqatigiinngilaat. Taamaattoq aningaasanut inatsisip isumaqatigiinniutiginissaannut aallarnisaatitut isigaat.
- Demokraatit taamaasiortarnerat takornartaanngilaq. Isumaqarpunga aningaasanut inatsisip isumaqatigiinniutiginissaannut aallarnisaataannaasoq. Isumaga malillugu ICC-mut tapiissutit ilanngartariaqanngillat, kisianni tamanna oqallisigilluarumaarparput aningaasanut inatsisissaq isumaqatigiinniutaalerpat, Inuit Ataqatigiit sinnerlugit aningaasaqarnermut ataatsimiititaliami ilaasortaq Naaja Nathanielsen oqarpoq.
Puisit amiinut tapiissutit ilanngarneqassanngippata aamma ICC-mut aningaasaliissutit ilanngarneqassanngippata Anda Uldum sipaarniarfiusinnaasunik allanik tikkuagassaqarpoq KNR-imut aningaasaliissutit ilaneqarnerannut atorneqarsinnaasunik.
- Kontot arlaqarput naalakkersuisut pisarneq maliinnarlugu aningaasaliissutit allanngortinnagit aningaasaliiffiginiagaat. Soorlu siusinaartumik soraarnerussutisiat, erniaqanngitsunut taarsersugassaanngitsunullu tapiissutit, naatsorsueqqissaartartik, ilinniartitaanermi qarasaasiaqarfik kontollu allat. Peqataaffigerusuppara KNR-imut aningaasaliissutit amerlinissaannut aningaasat nassaarinissaat tassami 10 millionit koruunit amigaatigineqarput. KNR pinngitsoorsinnaanngilarput aamma isornartorsiuisumik tusagassiorsinnaaneq tamanna nunatsinnut peqqinnartuummat, Anda Uldum nassuiaavoq.
KNR-imik aannaassiniartoqassappat, taava Siumukkut suleqataanissamut piareersimapput aamma Demokraatit suleqatigineqaraluarpataluunniit. Siumukkunnilli oqaatigineqarpoq, ICC-mut tapiissutinit KNR annaanniarneqassanngimmat.
- Takusinnaavara Demokraatinit, Anda Uldum Aningaasaqarnermut ataatsimiititalimi siulittaasuusoq, KNR-imik nukittuumik inissisimajuartitsinissamik qulakkeerinninniarluni aamma isumaqataasoq. Taamaattumik oqaannarsinnaavunga Siumukkut, Atassutikkut Demokraatillu tamatumunnga isumaqataammata amerlanerussuteqarlutillu. Taamaammat ernumanartoqanngilaq aaqqiiniarnissaq qanoq ilusilerlugu pissanersoq, Siumup politikkikkut oqaaseqartartuat Per Berthelsen taama oqarpoq.
