Demokraatit: Kikkulluunniit tunngaviatigut suleqatigisinnaavagut - aamma Siumut

Siumukkormiut avissaartuukkunnaarsimappata, Demokraatit Siumup qinersereernermi suleqatigeqqilernissaa piareersimaffigaat. 

Demokraatit siulittaasuat, Jens-Frederik Nielsen, taama oqarpoq.

- Kikkulluunniit suleqatiginissaat ammaffigaara - aamma Siumut. Siumumili avissaartuunnerit qinersereernermi anigorneqareersimassangatippakka, taanna oqarpoq.

Demokraatit Siumut suleqatigiunnaarlugu naalakkersuisoqataajunnaarneranniit qaammat ataaseq qaangiutingajalerpoq. 

Demokraatit naalakkersuisoqataajunnaarput, misigigamik Siumukkormiut siorna novembarip qaammataani siulittaasortaareernerminni politikkikkut allamik sammiveqalersimasut. 

AAMMA ATUARUK Demokraatit naalakkersuisoqataajunnaartut

Siumut saamerliuniarpallaalersimasoq aamma soorlu Kujataani Kuannersuarni aatsitassarsiulersaarneq pillugu tusarniaanermut tunngatillugu allanik sammiveqalersimasut, Jens-Frederik Nielsen isumaqarpoq.

Demokraatillu Siumut sutigut tamatigut suleqatigiunnaaritsik, Jens-Frederik Nielsen februaarip aallartinnerani naalakkersuisoqataajunnaartik nalunaarutigimmagu oqarpoq. Taamaattoqartillugulu partiitut ikorfartortaasinnaannginnerarput.

- Siumut sunik sammiveqarpiarnersoq nalorninarsivoq. Suleqatigiinnermi tatigeqatigiinnissaq pisariaqarpoq. Isumaqatigiissutaareersunnilli eqquutsitsinissamik qulakkeerinninnissaq pingaarnerpaavoq. Taamaaliortoqassanersoq kialluunniit taamani nalornisigaa, Jens-Frederik Nielsen oqarpoq. 

Demokraatit naalakkersuisoqataajunnaarmata naalakkersuisoqatigiit ikinnerussuteqalerput. Siumup siulittaasua, Erik Jensen, allanik suleqatissarsioraluarpoq, iluatsinngitsumilli. Qinersinissarlu naggataagut suaarutigineqarpoq. 

Siumukkormiullu qinersereernermi avissaartuukkunnaarsimassappata, Demokraatit Siumup suleqatigileqqinnissaa piareersimaffigigitsik, Demokraatit siulittaasuat erseqqissaavoq.

- Tamatta isumaqatigiinnissarput qulakkeertariaqarparput, taanna oqarpoq nangillunilu:

- Isumaqatigiinngissuteqaraannili tamanna pillugu naapeqatigiissimagaanni tunngaviatigut isumaqatigiinnissarput qulakkeertariaqarparput.