Qinersineq oqaluttuarisaanitsinnik allannguilluinnartoq. Demokraatit qinersinermi ajugaarujussuartut paasinarsimmat, qinersineq aqagukkut taamak nassuiarneqarpoq. 

Jens Frederik Nielsen, Demokraatit siulittaasuat nuannaarluinnartoq, KNR-ip unnuaq oqallitsitsinerani oqaaseqartinneqarpoq. 

- Soorunami tupaallannartuuvoq uagutsinnut. Isumalluarnikuuvugut, aamma misigisimavunga oqariartuutigut ersarissumik inuiaqatigiinnut apuunnikuullugit, kisianni naatsorsuutigisimanngikkaluarparput taamatut qinersineq allannguitigissasoq, taanna oqarpoq. 

Jens Frederik Nielsen 4.850-nik taaguunneqarluni qinigassanngortittuni taagorneqarnerpaavoq.  

Demokraatit taamaasillutik naalakkersuisunngornissamik isumaqatigiinniarnissanik aallarniisussaatitaalerpoq. 

- Pingaaruteqarpoq assannik isaassinissaq tamanut. Ataatsimoortariaqarpugut, nunat allat pillugit politikkimi susoqarnersoq eqqarsaatigissagaanni. Taamaammat ammaffigaarput partiit tamaasa oqaloqatigissallugit, Jens Frederik Nielsen taama oqarpoq. 

Naleraq, sukkanerusumik naalagaaffinngorusuttoq qinersinermi 25 procentinik taaguunneqarluni partiit annerit aappaattut inissippoq. 

Demokraatilli naalagaaffinngornissamut aqqut kingaannerulaartoq aqqutigerusukkaluaraat suli Naleqqap siulittaasuannik Pele Broberg-mik oqaloqatiginnikkusuppoq. 

- Qineqqusaarnikuuvugut USA-mut naalagaaffinngornissamullu eqqissilluta suliniarluta. Toqqammavipput sanarfeqqaassavarput. Taanna najoqqutaralugu isumaqatiginninniarnerit ingerlatissavagut assagulli tamanut isaappagut. Tamanna nunatta pisariaqartippaa. Demokraatit siulittaasuat taama oqarpoq eqqaallugulu aalisarnermut inatsit, allallu inatsisit isumaqatiginninniarnermi oqaluuserineqassasut.

Oqaluttuarisaanermi angusarliornerpaafffik 

Aamma Naleraq qinersinermi taaguunneqarluarpoq. Partiillu siulittaasuata Pele Brobergip sineriak tamakkerlugu sullisserusunnini qinerneqarluarnerminnut peqqutaatippaa. 

- Oqariartuutit sineriak tamakkerlugu sulerusunneq, taanna malunnarpoq tigulluarneqarsimasoq. Taamaammat massakkut iluatsitatut taasinnaasarput tassaavoq siulittaasoq ukiorpassuarni politikkimiissimasoq (Hans Enoksen, red) uannit taarserneqarmat ernumassutigineqartoq takutikkatsigu ernumassutissaqanngitsoq innuttaasullu tatigigaatigut, Pele Broberg isumaqatiginninniarnissaminnut piareeqqasoq taama oqarpoq. 

- Aamma taamak assigiinngitsigigunanngikkaluarpugut partiinut allanut massakkut allannguerusuttunut sanilliullugu, taamaammat uagut aamma torersumik ingerlariaqqinnissaq takorloorparput minnerunngitsumik eqqarsaatigalugu avataaniit qanoq sunniiniartiginikuutiginersut suna oqallisigissaneripput, uagutsinnulli pingaarnerpaajujuaannarpoq tassa nunatta inui toqqissillutik ineriartornermut peqataatinnissaannut sineriak tamaat oqariartuut tamaviaarutigissallugu, Pele oqarpoq. 

Inuit Ataqatigiilli Siumukkullu qinersisartunit pillarneqarput. IA 21 procentinik taaguunneqarpoq, Siumut 14 procentinik taaguunneqarluni partiit annerit sisamaattut inissippoq. 

Inuit Ataqatigiillu siulittaasuata, Múte B. Egedep, qinerneqarpiannginnertik naalakkersuisuusimasutut politikkiminnik suliarisimasatik naammassisimasatillu ukiuni tulliuttuni aatsaat malugineqarsinnaalerumaartut oqaatigaa.

- Akisussaaffik qinigaaffimmi kingullermi tigummisimasatsinni suliarpassuaqarpugut suli inuiaqatigiinni iluamik sunniutaannik malugineqarsinnaanngitsunik, Múte B. Egede oqarpoq. 

Erik Jensen, siumup siulittaasuata oqaluttuarisaanitsinni Siumup kinguariarnerujussua akisussaaffittut nammineq tiguaa. 

- Qinersinerup inerneri oqaluttuarisaanitsinni ajornerpaat pissarsiarivagut, akisussaaffillu tamaat nammineerlunga tiguara, Erik Jensen Siumup siulersuisuunerannik qinersineq pillugu oqaloqateqartussaq taama oqarpoq.