Assi: KNR

Demokraatit Inatsisartuni marloriaatinngorput

Demokraatit Inatsisartuni ilaasortaatitaat maannamut marluusimariarlutik Inatsisartunut ippassaq qinersinermi marloriaatinngortinneqarput, qinersinermilu angusarissaarnerpaasusutut nalilerneqarsinnaallutik.

Partiillu siulittaasuisa qinersinermi inernerit saqqummiunneqarnerisa kingorna KNR-imut apuummata, Demokraatit qinersinermi angusarisaat siulittaasuata Andreas Uldumip tupinnanngitsumik nuannaarutigaa:
 
- Assorujuk attorteqqavunga, tulluusimaarpunga, nuannaarpunga, tupaallappunga, kisianni aamma qineqqusaartissimasagut tulluusimaarutigaakka, tamarmik ilungersornikooqigamik, Demokraatit siulittaasuat Andreas Uldum oqarpoq.
 
Demokraatit katillutik 3468-init taaguunneqarput, namminerlu 1003-nit taanna taaguunneqarluni. Sassartitaalli ilaat ataaseq Nivi Olsen 1428-nit qinerneqarluni Demokraatini qinerneqarnerpaavoq, Nivi Olsenilu siulittaasuminit nersualaarneqarpoq:
 
- Nivi ulapinnikooqaaq. Taamaattussaannartut isigaara, siulittaasutut tulluusimaarpunga taama pikkoritsisigisumik sassartitsigama. Tulluusimaarnitaavunga uanga siulittaasutut, nuannaaqaanga, Andreas Uldum oqarpoq.
 
Qinersinermi inernerit takutippaat partiit annerit marluk imminnut qanittuararsuusut, naalakkersuisoqatigiinnissamullu isumaqatigiinniapiloortoqarsinnaassasoq aamma ilimanaateqarsinnaalluni. Kikkulli suleqatigisinnaassanerlugit maannangaaq oqaatigisinnaannginnerarpaa:
 
- Partii sorleq suleqatigissaneripput pingaarnerunngilaq, uagutsinnut pingaarnerpaavoq Nunatta aningaasaqarniarnerata aaqqinneqarnissaa, Andreas Uldum oqarpoq, nangillunilu:
 
- Oqaatigisinnaanngikkallarpara, arlaannaalluunniit suli oqaloqatiginnginnakku. Taamaammat takorlooruminaalaarpoq suli. Qinersineq aatsaat naammassivoq, oqaloqatigiinnerit taassuma kingorna aallartikkumaarput, Demokraatit siulittaasuat Andreas Uldum oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat