Demokraatit IA-llu suleqatigiikkumajunnaarnerat ilisimatuup paasiuminaatsippaa

Demokraatit Inuit Ataqatigiinnik suleqateqarunnaareersullu Asii Chemnitz Narup marlunngornermi borgmesteriujunnaarpoq. 

Tamanna sioqqullugu borgmesterip Naalakkersuisut aningaasaqarnermut politikkiat isornartorsiorpaa Naalakkersuisullu siulittaasuat qinersinissamik suaaruteqaqqullugu.

Demokraatit, Naalakkersuisunut aamma ikorfartortaasut, tamanna isoraat. 

 - Borgmesterip taama siunnersuuteqarnera periaasissarsiornermi isumatusaarnerunersoq apeqquserneqarsinnaavoq, inuiaqatigiilerinermik ilisimatooq Birger Poppel oqarpoq.

Suliniutit angisuut iperaraat

Inuit Ataqatigiit Demokraatillu Kommuneqarfik Sermersuumi ukiuni qulini suleqatigeereerput. 

Taakku kommunimut suliniutissat 2021-p tungaanut suleqatigiissutigissallugit 2017-imi atsioqatigiissutigaat. 

Meeqqat inuusuttullu pillugit isumaginninnikkut nukittorsaanissamik inuussutissarsiutinullu politikkit, Kommuneqarfik Sermersuumik ineriartortitsisussat, tamakkununnga ilaapput. 

AAMMA ATUARUK Demokraatit arsaq Asii Chemnitzimut utertikkaat: Taannaana aallartittoq

AAMMA ATUARUK Kommuneqarfik Sermersooq ullumi borgmesterertaassaaq

Demokraatit borgmesterimik tatiginnikkunnaarput, ilaatigut Tasiilami isumaginninnikkut sulinera isoralugu.

Ilisimatuup tamanna apeqquserpaa, Justus Hansenimi Tasiilameersuuvoq pissutsillu ilisimaarilluareerlugit: 

- Suliamut tamatumunnga sakkortuumik isornartorsiuineq paasiuminaappoq. 

Taamaammat partiit suleqatigiinnerisa ajalusoornera allanik pissuteqarsimasinnaasoraa. 

Nalornilersitsisinnaasoq

- Partiip qaqugu killiliissanerluni nammineq aalajangertussaavaa. Sorpassuit uagut allatulli innuttaasuulluta ilisimasaqarfiginngilagut, kisianni saqqummiunneqartut aallaavigigaanni, tamakkua suleqatigiinnermut akunnattoorutaanissaat paasiuminaappoq.

AAMMA ATUARUK Demokraatit suleqataajunnaarput

AAMMA ATUARUK IA Demokraatillu imminnut pisuuteqattaatilersut

Partiillu sakkortuumik qisuariaataat kommunimi politikkimik sulinermik innarliineruvoq, taamaammallu partiit aaqqiissutissamik ujartueqatigiissimasinnaasariaqartut, ilisimatooq isumaqarpoq.

- Taamaaliornerat sumut iluaqutaassanersoq takujuminaappoq, arlaannummi nalornilersitsillunilu tujormilersitsivoq. Taava aamma politikerit oqallinerat tusagassiuutinulluunniit imminnut allaffigeqattaarnerat atuarfiit anitsiartarfianni pisunit allaanerunngippata, immaqa inunnik pakatsitsivoq, inuiaqatigiilerinermik ilisimatooq Birger Poppel oqarpoq.