Kommuneqarfik Sermersooq: Demokraatit suleqataajunnaarput

Demokraatit borgmesterip Tasiilaq pillugu pissusilersuutai, Facebookkikkullu allataa pillugu kinguneqartitsipput, Kommuneqarfik Sermersuumimi Inuit Ataqatigiinnik suleqateqarnertik unitsippaat. Taama Demokraatit ilisimatitsipput.

- Suliat assingiinngitsut pillugit, soorlu kikkut tamarmik nalunngilaat Tasiilami susoqartoq, isumaqarpugullu tamakkua borgmesterimit iluamik suliarineqarsimanngitsut, Justus Hansen, Demokraatit kommunemi siulittaasuat oqarpoq.

Randi Vestergaard Evaldsen isumaqarpoq Asii Chemnitz Narupip juunip pingajuani facebookkikkut allataa killuussisuusoq, taassuma Naalakkersuisut  isornartorsiormagit.

Asii Chemnitz Narup taamani ilaatigut ima allappoq.

" Naalakkersuisunik, aningaasarsiornikkut aqutsisinnaanngitsunik, ajornartorsiutinillu pimoorussillutik aaqqissuteqarsinnaanngitsunik, illersuillutik partiit naalakkersuisunik napatitsisut paasiuminaatsippakka."

Taamatut allanneq Justus Hansenimit akuersaarneqarsinnaanngilaq.

- Facebook atorlugu uatsinnut appiussinera akuerisinnaanngilarput, Justus Hansen oqarpoq,

2017-imi kommunemut qinersinerup kingorna Inuit Ataqatigiit Demokraatillu suleqatigiinnissamik isumaqatigiissusiorput, 2021-imut qinerseqqinnissap tungaanut suut anguniassanerlugit isumaqatigiissutigisaminnik.  Kisianni qiningaaffiup affaanut piinnarlutik Demokraatit suleqataajunnaarlutik nalunaaruteqarput.

Demokraatit suleqataajunnaarneranni Inuit Ataqatigiit ikinnerussuteqaleraluarlutik suli borgmesteriutitaqassapput,  2021-imi qinerseqqinnissaq tikillugu. Borgmesterili tullersortaalu namminneerlutik tunuarniuteqarsinnaapput.