Demokaatit Wæver Johansenimut utoqqatserput

Allattoq Najaaraq Egede
apriilip 27-at 2006 05:38

Demokraatit Ineqarnermut attaveqarnermullu naalakkersuisumut Jørgen Wæver Johansenimut utoqqatserput.

Utoqqatserneq pivoq partii inatsisartut ataatsimiinneranni oqaluuserisassanut atatillugu pappiaranik kingusippallaartukkut tunniussisarnerannik naalakkersuisunut arlariinnut uparuaateqartoqareersoq.

Demokraatit Jørgen Wæver Johansen aamma Siverth K. Heilmann tallimanngornermi ataatsimiinnissami oqaluuserisassat pingasut amigaataammata uparuarpaat.

Uparuaaneq kukkunerusimavoq, Naalakkersuisup Jørgen Wæver Johansenip oqaluuseritinniagaa ullormut allamut nuunneqareersimammat. Demokraatit kukkunertik utoqqatsissutigaat.

- Paasivarput immikkoortoq 24 kingusinnerusukkut oqaluuserineqartussanngortinneqarsimasoq. Kukkunerput ajuusaarutigaarput, neriuppugullu utoqqatsissuterput akuerissagit, Palle Christiansen Wæver Johansenimut Demokraatit inatsisartuni ilaasortaatitai sinnerlugit allappoq.