Danskit savalimmiormiullu parnaarussiviliornissamut isumaqatigiissuteqartut
Savalimmiuni parnaarussaasoqartalissaaq, aamma sivisunerusumik.
Savalimmiuni ataatsimik isertitsiveqarput, taamaammallu parnaarussiviliortoqartariaqarpoq.
Danskit ministeriunerat, Mette Frederiksen, savalimmiormiullu naalakkersuisui Savalimmiuni parnaarussiviliornissamut ukiuni tulliuttuni arfineq-pingasuni aningaasalersuinissaq pillugu ullumi marlunngornermi isumaqatigiissuteqarput. Tamanna ministeriunerup Torshavnimut tikeraarnerani pivoq.
Isumaqatigiissut taanna anguniagaqaqatigiinnermik nalunaarutaasoq danskit ministeriunerata savalimmiormiullu lagmandiata, Bárour a Steig Nielsenip, atsiorpaat.
- Tamanna politikkikkut sivisuumik kissaataavoq. Marlussoriarluta oqaluuseraarput, taamaammat isumaqatigiissummik atsioqatigiinnerput nuannaarutigaarput, Bárour a Steig Nielsen tusagassiortunik katersortitsinermi oqarpoq.
Parnaarussiveqalerpat Mjørkadalurimi isertitsiveqarunnaassaaq.
- Pitsaanerusunik sinaakkusiinissamik atugassaqartitsinissamillu qulakkeerinninnissamik kissaateqarneq tunngavissaqarluarpoq. Pineqaatissinneqarsimasullu amerlanerpaartaasa ungasissumi isertitsivimmiinnissartik soorunami ajornartorsiutigisarpaat, Mette frederiksen oqarpoq.
Parnaarussiviliornissaq 2023-mi pilersaarusiorneqassaaq. 2027-miit 2030-p tungaanut parnaarussiviliortoqassaaq. Aningaasalersornissaanut pilersaarut Folketingetimit akuerineqassaaq.
Nutaarluinnarmik parnaarussiviliornissaq pilersaarutaavoq, pilersaarusiornermilu aamma parnaarussiviliorfissarsiornissamut sanaartorfigiuminarsaanissamullu piffissamik immikkoortitsisoqarpoq.