Danskit politikerii tikeraartut imaaginnavittut
Tikeraarnissaallu danskit politikeriisa piffissami kingullermi tikeraarnerisa arlallit ilagiinnarpaat.
Danskit avatangiisinut inuussutissalerinermullu ministeriat Esben Lunde Larsen, assartuinermut sanaartornermullu ministeri Hans Christian Schmidt, illersornissamut ministeri Peter Christensen kiisalu Folketingip Kalaallit Nunaannut tunngasunut ataatsimiititaliaa pissutsit assigiinngitsut qanimut paasisassarsiorfigalugit aggustip qaammataani Nunatsinnut tikeraarput.
Folketingip illersornissamut ataatsimiititaliaa septembarip qiteqqunnerani aamma tikeraassaaq, ilaatigut danskit sakkutooqarfii alakkarterneqassallutik.
Folketingip inatsiseqarnermut ataatsimiititaliaa sapaatit-akunnerani uani tikeraarpat attaviitsoq Aleqa Hammond aamma peqataassaaq. Folketingimit kreditkorterisaminik atuinermi kingorna pisortatigoortumik siullerpaamik Nunatsinnukartussanngorpoq. Folketingip Kalaallit Nunaannut tunngasunut ataatsimiititaliaata Nuummut Kujataanullu sapaatit-akunnerata siuliani tikeraarnerani Hammond peqataaniarani nalunaarpoq.
Danskit politikerii Folketingip ataatsimiinnissaa sioqqullugu aggustip septembarillu qaammataanni paasisassarsiorlutik angalanerusarput. Folketingimi ataatsimiinneq marlunngornermi oktobarip sisamaani aallartissaaq.
