Danskit naalakkersuisui Issittumi aningaasarsiornikkut siuarsaaniartut
Issittumi aningaasarsiornikkut siuarsaasoqassaaq.
Danskit naalakkersuisuisa 2017-18-imut nunanut allanut silimaniarnikkullu iliuusissaat, nunanut allanut tunngasunut ministerip Anders Samuelsenip ineriartortitsinermullu ministerip Ulla Tørnæsip Københavnimi pingasunngornermi saqqummiussaat naapertorlugu, danskit naalakkersuisui tamanna sulissutiginiarpaat.
Danskit naalakkersuisuisa suliassaqarfiit immikkut sulissuteqarfiginiagaat tallimaasut ilagaat Issittumut tunngasut, Issittumilu aningaasarsiornikkut sukkanerusumik ineriartortitsinissaq tamatumani aamma ilaavoq.
- Issittumi najugallit 4 millionit missaaniinnerat eqqaamassavarput. Taakkulu uagut avatangiisinik illersuinissarput, aammali siunissami periarfissanik atorluaasinnaanissartik pisinnaatitaaffigaat, Anders Samuelsen KNR-imut taama oqarpoq.
AAMMA ATUARUK Danskit naalakkersuisuisa Issittumut tunngasunut aallunneruniaraat
Aningaasat suminngaanniissanersut nalunartoq
Iliuusissami allassimavoq "issittumi aningaasalersuinermut aaqqissuussinissamut periarfissanik qulaajaanissamut periarfissat naalakkersuisut misissorniarpaat".
"Issittumili aningaasalersuinermut aaqqissuussamik" oqarnermi suna pineqarnersoq aningaasallu suminngaanniissanersut, Anders Samuelsenip erseqqissumik oqaaseqarfigiumanngilaa.
- Pimoorussamik sulissutiginiarneqassaaq, aningaasaliisoqarnissaalu pisariaqassasoq aamma ilimanarpoq. Tamannaavorlu nalunaarusiami allaaseraarput (iliuusissaq, aaqq.), qanoq iliortoqassanersoq erseqqissumik oqaatiginngikkaluarlugu. Nalunaarusiamullu matumunnga ittumut tamanna ilisarnaataavoq. Naleralersuissaagut, taamaalioreeruttalu suliassartavia aallartissavarput, Anders Samuelsen KNR-imut taama oqarpoq.
AAMMA ATUARUK Ilisimatuussutsikkut suleqatigiinneq nukittorsarneqarpoq
Lars Løkke Rasmussenilli qanittukkut oqaatigaa Nunatsinni inuussutissarsiornikkut siuarsaanissamut aningaasaliisarfimmik aningaasaateqarfiliornissaq piareersimaffigalugu. Taamaaliortoqassappalli Namminersorlutik Oqartussat tamanna kissaatigalugu Danmarkimut pisortatigoortumik saaffiginnissutigisariaqaraat. Tamannalu suli pisimanngitsoq, Løkkep maajimi ilisimatitsissutigaa.
Iliuusissamili erseqqissaatigineqarpoq nunanut allanut tunngasunut ministereqarfiup Nunatta Savalimmiullu avammut nioqqutaannik pilerisaarinernik amerlanerusunut ikiuunniartoq nunallu takornariarfissatut pilerinartutut nittarsaanneqarnissaat aamma peqataaffiginiaraa.
AAMMA ATUARUK Nunarput Issittumi ilisimatusarnermi katersuuffiussasoq
Ilisimatusarnikkut misissuivik Issittumilu Siunnersuisooqatigiit
Nunatsinni ilisimatusarnikkut 'isaariamik' taaneqartumik pilersitsinissamik kissaatigineqartoq aamma nunami aningaasarsiornikkut siuarsaaqataasinnaasutut iliuusissami eqqaaneqarpoq. Samuelsenilu tamatumunnga ima oqarpoq:
- Isumaliutigisatta ilaat (…) tassaavoq Kalaallit Nunaanni ilisimatusarnikkut isaariatut ittumik pilersitsinissaq. Tamannali maannakkorpiaq annertunerusumik oqaaseqarfigisinnaanngilara.
- Aningaasaqarnermulli aamma tunngassuteqarpoq. Tamanna uterfigiumaarpara.
Danskit naalakkersuisuisa novembarimi inissitsiterisa kingornali Anders Samuelsen Nunatta Danmarkillu atassuteqarnerat, naalagaaffeqatigiit soqutigisaat, Issittumut tunngasut allallu pillugit itisiliiffiusumik apersornissaanik KNR noqqaassuteqarsimavoq. Apersuinissarli maannamut suli iluatsissinnaasimanngilarput.
