Danskit isumaginninnermut ministeriata angerlarsimaffiup avataanut inissiinermi misissueriaatsit nutaat misissorniarai

Danskit kommuniisa angerlarsimaffiup avataanut inissiinermi suliani angajoqqaanik naliliisarnermut atortagaannut, misissueriaatsinut tunngatillugu periarfissamininnguamik ammartoqarpoq.

Danskimmi isumaginninnermut ministeriata, Pernille Rosenkranz-Theilip (S) danskit kommuniisa ilaqutariinnut atillugu naliliigaangata kulturikkut oqaatsitigullu assigiinngissutsit eqqarsaatigineqarnissaat taperserpaa.

Tamanna folketingimut ilaasortamut, Aaja Chemnitzimut (IA) akissuteqaammini allappaa.

AAMMA ATUARUK Folketingimi ilaasortani nunatsinneersut meeqqanik allamut inissiisarnermut: Iliuuseqalertortariaqarpoq

- Angajoqqaat piginnaasaannik misissuinermut atatillugu misissueriaatsit naleqqussarneqarnissaat arlalinnik suliniuteqarfigisinnaagunarput, taakkuli aningaasalerneqarnissaannik nassaarnissaq pisariaqarpoq, isumaginninnermut ministeri allappoq.

Taanna – aningaasalerneqarnissaa – akimmiffiusuni kingulliuvoq.

Misissueriaatsinimmi nutaamik, isumaginninnermi siunnersortit Danmarkimi kalaallit ilaqutariit ulluinnaanni ilitsoqqussanik, ileqqunik oqaatsinillu pingaartitsinissaannut atorneqartussanik pilersitsinissaq akeqarpoq.

Misissueriaatsit allanngortinnissaannut aningaasat ilaatigut isumaqatigiinniutigineqalereerput. Isumaginninnermut, peqqinnissamut suliffeqarnermullu oqartussaaffimmut aningaasat pillugit Isumaginninnermik Ministereqarfimmut isumaqatigiinniarnikkut tamanna pivoq.

- IA-p angajoqqaat piginnaasaannik misissuinermut oqaatsinut kulturimullu atatillugu naleqqussaanissamut, pitsaanerusumik oqalutseqarnissamut kiisalu angerlarsimaffiup avataanut inissiinernut tunngatillugu suliani kalaallit oqaasiinut kulturiannullu tunngatillugu siunnersuisartunik angalaqatigiittartunut aningaasassarsiulereerpoq, Aaja Chemnitz KNR-imut mailikkut allappoq.

Isumaqatigiinniarnerit sapaatini akunnerni aggersuni ingerlanneqassapput.

Nalunaarusiap kommunit ilaqutariillu akornanni suleqatigiinneq ajornakusoortoq takutikkaa

Danmarkimi kalaallit ilaqutariit meerartaasa angerlarsimaffiup avataanut inissinneqartarnerat danskinit ilaqutariinnit inissiisoqartarneranut sanilliullugit ukiorpassuarni tallimariaataannik amerlanerupput.

Tamanna ukiuni kingullerni nunatsinni oqallisaangaatsiarpoq, minnerunngitsumillu Peqatigiiffik Mentor Immanuelip, tassa Danmarkimi kalaallit danskillu akornanni kulturikkut paaseqatigiittoqarnissaanik suliaqartup tamanut nalunaaruteqartoqarnerata kingorna.

AAMMA ATUARUK Nalunaarusiaq: Qallunaatut oqqarlunneq paatsooqatigiinnerillu Danmarkimi kalaallit meertaasa allamut inissinneqarnissaannut sulianut sunniisartut

Danmarkimi ilisimatusarfiup VIVE-p nalunaarusiaata siorna saqqummersinneqartup Danmarkimi kalaallit ilaqutariit inuuniarnermikkut ajornartorsiuteqartut kiisalu danskit oqartussaasuisa suleqatigiinnerat oqaatsitigut kulturikkullu assigiinngissutsit pissutigalugit ajornakusoortoq takutippaa.

Ajornartorsiutaasullu illuatungeriit imminnut tunngatillugu isummanik pigiliutiinnagaqarnerannik ajornerulersinneqarpoq, sulianilu amerlasuuni oqalutsimik amigaateqartoqartarluni.

Danskit isumaginninnermut ministeriata oqarnera naapertorlugu kulturikkut oqaatsitigullu assigiinngissutsit eqqarsaatigineqarnissaat pingaaruteqarluinnarpoq.

- Suliamik torersumik isumaginninnermi assigiimmik isumaginnittoqarnissaa naatsorsuutigineqarpoq, aamma kommunit oqaatsitigut kulturikkullu unammillernartuusinnaasut maluginiassavaat, taamaaliornikkut suliaq naammattumik paasissutissiissutigineqarnissaa aamma kommunit angajoqqaallu akornanni paasinerloqatigiittoqarnerata annikillisarneqarnissaa qulakkeerneqassaaq, Pernille Rosenkranz-Theil oqarpoq.