Danskit coronavirusimik tunillatsissimallutik toqusut tallimanik amerlisut
Danskit coronamik tunillatsissimasut kingornalu toqusut amerliartuinnavipput.
Virusimik tunillatsissimanermi kingorna toqusut ataasinngornermi 77-iupput. Taakku ullup siulianut sanilliullugu tallimanik amerlanerusut, Statens Serum Institutimik kisitsisit takutippaat.
Coronamik tunillatsissimasut Danmarkimilu napparsimmavinnut unitsinneqartut amerliartuinnavipput.
Inuit 533-t napparsimmavimmi uninngapput, taakkulu ullup siulianut sanilliullugu 34-nik amerlanerupput.
Napparsimmavimmi uninngasunit 533-nit 137-t peruluttut uninngavianniipput. Kisitsit sapaammut sanilliullugu arfinilinnit amerleriarneruvoq.
137-niillu 119-it ataasinngornermi ajungaaramik anersaartornissamut anersaartuummik atortoqartariaqarput. Taakku ullup ataatsip ingerlanerani arfinilinnik amerlipput.
AAMMA ATUARUK Danmarkimi coronavirusimik toqquteqartut maanna 52-iusut
Danmarkimi inuit 2555-it coronavirusimik tunillatsissimasutut uppernarsarneqarnikuupput. Inuilli ersiuteqanngitsut misissorneqarneq ajormata tunillatsissimasut suli amerlanerunissaat naatsorsuutigineqarpoq.
Danskit oqartussaasui naalakkersuisuilu amerlanerusunik misissuerusupput.
Peqqinnissamut aqutsisoqarfiup oqarnera naapertorlugu inuit 5000-it ullormut misissorneqartarnissaat anguniagaavoq. Taamaaliornikkut Danmarkimi innuttaasoqassutsimut angisumi Norgemi misissorneqartartut amerlassusaat amerlaqatigipajaalissavai.
Peqqinnissamut oqartussat danskit 580.000-it – tassa innuttaasut 10 procentiisa missaat tuniluunnerup aallaqqaataani - upernaap ingerlanerani tunillatsissinnaasut nalilerpaat.
Coronavirusimik tunillatsissinnaasunit 11.200-t missaat napparsimmavimmut unitsinneqartariaqassangatinneqarput, taakkunanngalu 2800-t peruluttut uninngavianniittariaqassasut nalilerneqarpoq.
AAMMA ATUARUK Tamaat isigalugu: Coronavirus pillugu killiffik
Johns Hopkins University nunarsuarmi coronavirusip tuniluunneranik qanimut malinnaaviginnittoq naapertorlugu nunarsuarmi inuit 732.153-it maannamut tunillatsissimapput.
Inuit virusimik tunillatsissimasut nunarsuaq tamakkerlugu maanna 34.686-iupput.
Virusimik tunillatsissimasut ilarparujussui peqqisseqqittutut nalunaarutigineqarsimapput. Johns Hopkins Universitylu naapertorlugu taakku maanna 154.673-iupput.
Danmarkimi peqqisseqqittutut nalunaarutigineqartut pisortatigoortumik suli kisitsisaatigineqanngillat. Statens Serum Institutilli kisitsisit piffissami qaninnermi piareernissai naatsorsuutigaa.
/ritzau/