Danmarkimi coronavirusimik toqquteqartut maanna 52-iusut

Danmarkimi coronamik tunillatsissimallutik toqusut amerliartuinnavipput.

Toqusutut nalunaarutigineqartut tallimanngornermi 52-iupput, taakku sisamanngornermi naatsorsuinermit kingullermit aqqanilinnik amerlanerupput. Statens Serum Institut taama paasissutissiivoq.

Naak inuit 52-it coronavirusimik tunillatsissimanermi kingorna toqugaluartut tamanna toqqutaasimasariaqanngilaq.

Virusimik tunillatsinnermit ullut 60-it qaangiutsinnagit toqusut naatsorsueqqissaarnermi tamanna toqqutaasutut ilaatinneqartarpoq.

AAMMA ATUARUK Danmarkimi coronaviruseqarlutik toqusut 41-pput – 386-illu napparsimmavimmi uninngallutik

Toqusut amerlanerunerisa saniatigut Danmarkimi napparsimmavinnut unitsinneqartut aamma amerliartorput.

Taakku tallimanngornermi 430-upput. Sisamanngornermillu 44-nik amerlanerullutik. Napparsimmavimmi uninngasunit 109-t napparsimangaaramik peruluttut inaanniitsinneqarput, taakkunanngalu 89-it anersaartuuteqartinneqartariaqarlutik.

Danmarki nunarsuaq tamakkerlugu tunillaassuuttoqarnerani sapaatini akunnerni siullerniippoq, peqqinnissamullu oqartussat oqarnerat naapertorlugu tunillatsittut poorskip kingorna sapaatip-akunnera 16-imi amerlanerpaassangatinneqarput. Ilumulli taamaattoqassanersoq qularnarpoq.

Danmarkimi tunillatsissimasutut uppernarsarneqartut 133-nik amerlanerulerlutik 2010-nngorput.

Tunillatsissimasulli amerlassusaat Danmarkimi tunillatsissimasutut ataatsimut amerlassuserinngilaat, inuimmi sakkukitsuinnarmik ersiuteqartut ersiuteqanngitsullu misissorneqartanngillat.

Taamaammat naatsorsueqqissaarnermi nalunaarsimanngitsunik tunillatsissimasorpassuaqarsinnaavoq.

AAMMA ATUARUK Tamaat isigalugu: Coronavirus pillugu killiffik

Peqqinnissamut oqartussat danskit 580.000-it – tassa innuttaasut 10 procentiisa missaat tuniluunnerup aallaqqaataani - upernaap ingerlanerani tunillatsissinnaasut nalilerpaat.

Coronavirusimik tunillatsissinnaasunit 11.200-t missaat napparsimmavimmut unitsinneqartariaqassangatinneqarput, taakkunanngalu 2800-t peruluttut uninngavianniittariaqassasut nalilerneqarpoq.

Naliliinerup saniatigut danskit 1680-it aamma 5600-it akornanniittut coronavirusimik tunillatsissimanerminni toqusinnaasut nalilerneqarpoq.

Toqusulli amerlassusaat akuttuinnassasoq oqartussat aamma nalilerpaat.

/ritzau/