Danskit aningaasanut inatsisissaat kalaallinit piffissaq kingulleq sunniuteqarfigineqartoq
DANMARK: Danskit 2015-imut aningaasanut inatsisissaat Folketingimi pingajussaaneerneqarmat kalaallit ilaasortaatitaata piumasaqaataasa ilanngutsinneqarnissaat IA-p Siumullu piffissaq kingulleq iluatsippaat.
Danskit naalakkersuisuisa, Enhedslisten aamma SF peqatigalugit, aningaasanut inatsisissaq piareersimasoq novembarip qaammataani saqqummiutereeraluarpaat. Tamannali IA-p Siumullu peqatigiiffiginngisaannik pivoq, danskit aningaasaqarnermut ministeriata Bjarne Corydonip (S) Inatsisartunut qinersinissaq pissutigalugu taakkuninnga isumaqatigiinniaqateqarnini kinguartimmagu, danskit aningaasaqarnermut ministeriaqarfiat taama ilisimatitsivoq.
Corydonilli kalaallit partiivisa piumasaqaatigisaat arlariit sapaatit-akunnerani uani akuerai, ilaatigut piumasaqaatigineqartut annersaat, tassalu kalaallinut Danmarkimut nooqqammersunut immikkut ittumik suliniuteqarnissamut aningaasaliissuteqarnissaq. Suliassaqarfimmut tassunga katillugit 8 millionit koruunit aningaasaliissutigineqarput, 2015-imi 2016-imilu ukiumut 4 millionit koruunit tunniunneqassallutik. Tamannalu Siumumit Inuit Ataqatigiinniillu nuannaarutigineqarpoq.
- Naammagisimaartupilussuuara, taamaammat aamma aningaasanut inatsisissatut siunnersuut aqagu (sisamanngornermi, aaqq.) inaarutaasumik taasissutigineqalerpat akueralugu taasissaanga, Folketingimut ilaasortaq Johan Lund Olsen (IA) KNR-imut taama oqarpoq.
Eqqartuussaasimasunut toqqammavigisassanngortitat assigiinnik atugassaqartinneqalissapput
Danskit aappaagumut aningaasanut inatsisissaat aamma eqqartuussaasimasunut toqqammavigisassanngortitanut, kalaallinik danskit parnaarussiviiniittunik pulaartartuusunut, malittarisassat naligiissinneqarnissaannik aamma imaqarpoq. Danskit naalakkersuisui kalaallinut eqqartuussaasimasunut toqqammavigisassanngortitanik immikkoortitsinerarlugit arlarleriarlugit isornartorsiorneqartarsimapput, taakkununnga akissarsiaritinneqartut atugassarititaasullu danskinut eqqartuussaasimasunut toqqammavigisassanngortitanit ajornerusumik inissisimammata.
Danmarkimi inatsisinik atortitsinermut ministeriaqarfik nalunaarummik nutaamik naligiinnerusumik atugassaqartitsisumik ukioq naatinnagu saqqummiussissasoq, danskit aningaasaqarnermut ministeriata Siumumut Inuit Ataqatigiinnullu allakkamini taama neriorsuuteqarpoq.
Tamatuma saniatigut Kalaallit Nunaanni suliffeqarfiit 2015-imit atuutilersumik danskit naalagaaffiata Ineriartortitsinermut aningaasaateqarfianit taarsigassarsisinnaalernissaat aqqutissiuunneqassaaq. Tamannalu Ineriartortitsinermut aningaasaateqarfik pillugu inatsisip allanngortinneqarnissaa Folketingimi aappaagu januaarip qaammataani taasissutigineqarpat pisussaavoq.
Aningaasanut inatsisissatut siunnersuutip suliarineqarnera sakkortuumik isornartorsiorneqarpoq
Aappaagumullu aningaasanut inatsisissaq kalaallit piumasaqaataanik imaqaraluartoq, danskit aningaasaqarnermut ministeriata kalaallit partiivinik isumaqatigiinniarnernik kinguartitsisimanera Siumumit IA-miillu isornartorsiorneqarpoq.
Nick Nielsen, Doris Jakobsenimut sinniisussatut Folketingimut ilaasortanngoqqammersoq danskit aningaasaqarnermut ministeriannut Bjarne Corydonimut allakkiami ima allappoq:
- Suliap ingerlanneqarsimanera akuersaarneqarsinnaanngilluinnartutut isigaara. Uangami isumaga malillugu Folketingimut ilaasortanik, Frederikshavnimeersuuppata, Savalimmiuneersuuppata, Gudhjemimeersuuppata Kalaallit Nunaanneersuuppataluunniit assigiinngisitsisoqartussaanngilaq.
Johan Lund Olsenittaaq 'danskit naalakkersuisuisa tamatumunnga tunngatillugu isumaat isumaqatiginngittorujussuullugu' KNR-imut oqaatigaa.
