Danskit aningaasanut inatsisissaat isumaqatigiissutigineqartoq
Danmarkimi naalakkersuisut Venstreneersut aappaagumut aningaasanut inatsisissatut siunnersuutaat ullumi isumaqatigiissusiorfigineqarpoq. Dansk Folkeparti, Det Konservative Folkeparti Liberal Alliancelu aappaagumut aningaasanut inatsisissaq atsioqatigiissutigaat.
Allattoq Thomas Munk Veirum
novembarip 19-at 2015 10:05
Nutserisoq Mads Lynge
Peqqinnissaqarfiup aningaasaliiffigineqarnera 2,4 milliardit koruuninik ilaneqassaaq, utoqqaallu immikkut sullinniarneqartut nalunaarutigineqarpoq, nappaatit piaarnerusumik suussusersineqarlutillu katsorneqartarnissaat aamma sulissutiginiarneqarluni.
Puigortunngornikut immikkut aamma sullinneqarnerulissapput, utoqqarnullu nakorsaatit aaqqissugaanerusumik aqunneqalernissaat siunniunneqarpoq, soorlu aamma ernisarfiit pitsanngorsaaviginiarneqartut, pinasuartumillu sullissineq aamma pitsanngorsaaviginiarneqarluni.
Utoqqarnik sullissinermi atugassanik ukiumut 1 milliardit koruuninik aningaasaliisoqarnerusoqartalissaaq, politiinullu aningaasaliisarnerit ukiuni tulliuttuni ukiumut 1,9 milliardit koruuninik ilaneqassallutik.
