Venstre: Danskit aningaasanut inatsisaanni pissutsit Kalaallit Nunaannut Savalimmiunullu pitsaasuupput
Kalaallit savalimmiormiullu folketingimut ilaasortaat danskit aningaasanut inatsisaata ilaata isumaqatigiinniutigineqarnerani ajornerusumik iliuuseqarfigineqarneq ajorput. Muminganilli.
Venstrep aningaasanut tunngasunut oqaaseqartartua, Torsten Schack Pedersen folketingimut ilaasortap Siumumeersup, Aki-Matilda Høegh-Damip isornartorsiuineranut qisuariaateqarteqarluni taama oqarpoq.
Taassuma atlantikup avannaanit qinikkat danskit aningaasanut inatsisaanni atlantikup avannaamiuinut aningaasaliissutit kisimik pillugit isumaqatigiinniaqataasinnaanerat Danmarkillu nunatsinni Savalimmiunilu akisussaafiinut tamanut isumaqatigiinniaqataasinnaannginnertik isornartorsiorpaa.
Torsten Schack Pedersenilli isornartorsiuineq akerlilerpaa.
- Folketingimut qinerneqarama qanoq inneranut atatillugu atlantikup avannaanut aningaasaliissuteqanngilaq, soorunamilu atlantikup avannaanit qinikkat sisamat atlantikup avannaamiunut aningaasaliissutinut atatillugu qanoq kissaateqarnissaminnut pisinnaapput, taanna oqarpoq.
Venstre: Kalaallit Nunaat sipaarniuteqarnermi unammillerniartariaqanngilaq
Atlantikup avannaamiuinut aningaasaliissutit Løkkep naalakkersuisuutitaqarnerani immikkut ittumik pilersinneqarput, taakkulu atlantikup avannaanit folketingimut qinikkat isumaqatigiinniutigisinnaavaat.
Tamanna kalaallit savalimmiormiullu ilaasortaatitaasa danskit aningaasanut inatsisaata isumaqatigiinniutigineqarneranut qaaqquneqartannginnerminnik danskillu partiivi aqqutigalugit sunniuteqarniaqqaartariaqarnerminnik isornartorsiuinerisa kingorna pivoq.
Danmarkimi Kalaallit Nunaanni oqartussaaffinnut 30-t tungaannut aningaasaqarnikkut suli akisussaasuummat kalaallit folketingimut qinikkat susassaqarfinnut taakkununnga aningaasaliissutit aamma isumaqatigiinniutigisariaqaraluarpaat – immikkullu ittumik aningaasaliissutaannarmiinnani, Aki-Matilda Høegh-Dam isumaqarpoq.
- Aningaaqarnermut ministerimut piviusumik isumaqatigiinniutigisatsinnik ilanngussinnginneq danskit politikeriinit Kalaallit Nunaannut Savalimmiunullu atatillugu susassaqarfinnik suliarisartakkaminnut akisussaaffigiumannginninneruvoq.
Torsten Schack Pedersenilli tamanna akerlilerpaa. Atlantikup avannaanut aningaasaliissutit danskit Danmarkimi oqartussaaffiisa ilaannut aamma atorneqarsinnaasut taassuma erseqqissaatigaa.
Aningaasaliissutiniimmi aningaasat sumut atorneqarnissaannut malittarisassaqanngilaq.
- Atlantikup avannaamiuinut aningaasaliissutilioraanni taava suut nukinginarnerunersut pingaarnerunersullu salliunneqarsinnaapput. Aningaasaliissutit sunut atorneqartarnerat siammasingaatsiartoq misilittakkat takutippaat, sumullu atorneqassannginneranut malittarisassaqarneranik ilisimanninngilanga, Torsten Schack Pedersen oqarpoq.
Kalaallit savalimmiormiullu qinigaatitaat kissaatigisaminnut aningaasanik qulakkeerinissamut periarfissaginnerusut taassuma ilanngullugu oqaatigaa, aningaasammi politikerit sisamat akornanni kisimik agguaanneqartarput.
Tamatuma saniatigut aningaasat taakku suminngaanniit tiguneqarnissaat isumaqatigiissutigineqaqqaartariaqanngilaq.
Nunatsinnut aningaasaliissutit isumaqatigiinniutigineqartartut
Atlantikup avannaanimiunut aningaasaliissutit 20 millionit koruuninit 30 millionit koruuninut ukioq manna qaffanneqarput, taakkulu naalagaaffeqatigiinnut tunngasunut arlaannut atorneqarsinnaallutik.
Danskit nunatsinni susassaqarfippassui assersuutigalugu eqqartuussisoqarfik Danmarkimi eqqartuussisoqarfimmit pissutsinit ajornarusumik inissisimanerungaarami aningaasaliissutilluunniit tamarmik tassunga atorneqaraluarunik naammannavianngitsut Aki-Matilda Høegh-Damip erseqqisaatigaa.
Tamannali siunertaanngitsoq, Venstrep aningaasaqarnermut oqaaseqartartua erseqqissaavoq. Susassaqarfinni angisuuni soorlu eqqartuussisoqarfinnut illersornissaqarfinnullu tunngasut isumaqatigiissutini allani isumaqatigiinniutigineqartarput, aningaasanut inatsimmiunngitsoq. Tassaanilu atlantikup avannaanit qinikkat danskit partiivi aqqutigalugit sunniuteqarniarsinnaapput.
- Pissusissamisoorpoq assersuutigalugu politiinut isumaqatigiissutit imaluunniit pinerluttunik isumaginnittoqarfimmut tunngasut isumaqatigiinniutigineqaleraangata savalimmiormiut kalaallillu qinikkat taakkunani sunniuteqarniarsinnaapput, Torsten Schack Pedersen oqarpoq.
KNR-ip aningaasaqarnermut ministeri, Nicolai Wammen (S) aamma Socialdemokraatit Kalaallit Nunaannut tunngasunik oqaaseqartartuat Flemming Møller Mortensen oqaaseqartinniarsarai. Taakkuli suliamut atatillugu oqaaseqarumanngillat.
Moderaternenit isornartorsiuineq KNR-imut aamma itigartitsissutigineqarpoq.