Danskip tunillatsissimanera nunatsinni upalungaarsimanermut allannguinngitsoq
Danskip coronavirusimik tunillatsinneratigut coronavirus COVID-19-imik taaguuteqartoq nunatsinnut qanilliallaqqilaarpoq.
Tamannali nunatsinni upalungaarsimanermut januaarip ulluisa 31-anni atuutilersumut allannguissanngitsoq, Nappaatit tuniluuttartut pillugit ataatsimiititaliap siulittaasua, Svend Foldager oqarpoq.
Inuit 82.548-t coronavirusimik tunillatseqqanngikkunik tunillatsinnikuupput
Inuit 33.212-it coronaviruseqareerlutik peqqisseqqipput
Inuit 2.810-t coronavirusimik toqquteqarput
Tusarfik: Johns Hopkins CSSE
- Tamanna upalungaarsimanermut sunniuteqassanngilaq. Danmarkimi tunillatsittoqarsinnaanera pillugu oqaluuserinninnikuullutalu sillimavugut.
- Maanngaanniit Danmarkimut ungasippoq. Taamaakkaluartorli piareersimavugut, maannakkullu iliuuserineqartariaqarsorisatsinnut pilersaaruteqarpugut, Svend Foldager oqarpoq.
Tunillatsinnissap aarlerinarnera allannguuteqanngitsoq
Nappaatit tuniluuttartut pillugit ataatsimiititaliaq nalinginnaasumik pilersaarutaareersumillu tallimanngorpat ataatsimiissaaq, tassanilu allannguingaatsiartumik aalajangiinissaq siulittaasup naatsorsuutiginngilaa.
- Danmarkimi inummik ataatsimik COVID-19-imik tunillatsittoqarsimanera oqaluuserissavarput. Tamanna uagutsinnut sunniuteqarnersut, nalunaarutigisartakkavut allanngortissanerivut imaluunnuut nalunaarutivut amerlisissanerlugit oqaluuserissavarput. Taamaakkaluartorli tunillatsinnissamut aarlerinartumut atatillugu allanngortoqanngilaq, Svend Foldager oqarpoq.
AAMMA ATUARUK Ataatsimiititaliaq sulilerpoq: Coronavirusip nunatsinnut annguteratarnissaanut upalungaarsimavugut
Nappaatit tuniluuttartut pillugit ataatsimiititaliaq COVID-19-imut atatillugu pissutsinut malinnaajuassaaq upalungaarsimanermullu allannguisoqarnissaanut pissutissaqarnersoq qaqutigoortuunngitsumik nalilersuissalluni.
Nalunaarusiaq: COVID-19 peqqissuuguit, sakkukippoq
Ilisimatuutut allaatigisap, maannamut annerpaagallartup COVID-19 peqqissooreersut amerlanertigut sakkukinnerusumik atugarisaraat sapaatip akunnerata siuliani takutippaa.
Nalunaarusiap tunillatsissimasut 80 procentiisa nappaat sakkukinnerusumik atugarigaat ilaatigut uppernarsaraa, Ritzau allappoq.
AAMMA ATUARUK Nappaatinut akiuussutissaliorfik: Coronavirusip tuniluukkunnaariartornera nalunaarusiami ersertoq
Statens Serum Institutip suliami pisortaa, Kåre Mølbak tassunga atatillugu ima naliliivoq:
- Nappaatip inunnut peqqissooreersunut sakkukitsuuneranut tamanna uppernarsaataavoq, taamaakkaluartorli ukioqqortunerusunut sanngiinnerusunullu sakkortusinnaalluni, Kåre Mølbak Ritzau-imut oqarpoq.
- Nappaat nuannertut imaluunniit anersaartorfitsigut tunillatsissimanertut nammineq qaangiuteqqittarpoq, Kåre Mølbak oqarpoq.