Nappaatinut akiuussutissaliorfik: Coronavirusip tuniluukkunnaariartornera nalunaarusiami ersertoq

Inunnik coronavirusimik tunillatsissimasunik 72.000-nik misissuineq nutaarsiassatsialammik imaqartoq, Naalagaaffiup Nappaatinut Akiuussutissaliorfiani tassa Statens Serum Institutimi pisortaq isumaqarpoq.

Allattoq Ritzau

februaarip 19-at 2020 08:13

Nutserisoq Marie Kûitse

Kinami coronavirusip covid19-ip tuniluutipiloornera maanna kinguariartulerpoq.

Statens Serum Institutimi pisortaq, Kåre Mølbak taama nassuiaavoq.

Taassuma inuit 72.000-it nualluummik tunillatsissimasut malinnaaffigereerlugit qiimmaallannartumik nalunaaruteqarpoq.

- Misissuinermi takusinnaasarput naapertorlugu nappaalaneq januaarimi qaffasinnerpaaffissaminiippoq. Tamanna nutaarsiassatsialaavoq, Kinamimi eqqortumik iliuuseqartoqarsimaneranik takutitsivoq, Kåre Mølbak oqarpoq.

AAMMA ATUARUK Misissuineq: Coronavirusimik tunillatsissimasut 100-gaangata marluk nualluut toqqutigisarpaat

Kinami ilisimatuut aviisianni, Chinese Journal of Epidemiologymi, nappaammik tuniluuttumik aatsaat taama annertutigisumik saqqummersitsisoqarpoq.

Nappaammik tunillatsissimasut 80 procentii tunillatsissimanermut ersiutaasinnaasut annikinnerusut atorsimagaat, nalunaarusiami ersersinneqarpoq.

- Misissuinermi paasisatta ilagaat inuit peqqinnerusut nappaat annikinnerusumik atugarigaat, utoqqarnut sanngiinnerusunullu sakkortuumik atugarineqarluni, Kåre Mølbak oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.