Danskeq alla coronavirusimik tunillatsissimasoq
Nutarterneqarpoq: Qulequtaaraq ilanngullugu ilanngutassiaq nutarterneqarpoq.
Coronavirusimik tunillatsissimasut Danmarkimi ullut marluk ingerlaneranni marlunngorput.
Danskeq alla coronavirusimik aamma tunillatsissimasoq tallimanngornermi uppernarsarneqarpoq.
Tunillatsissimasoq Italiap avannaani sisorariartarfimmeeqqammersoq quersorluni napparsimalersimasoq, Peqqinnissamut Aqutsisoqarfiup paasissutissiissutigaa.
Taanna napparsimmavissuarmi, Rigshospitalimi misissorneqarpoq. Misissorneqartoq coronavirusimik tunillatsissimasoq tallimanngornermi uppernarsarneqarpoq.
Taanna Italiap avannaani februaarip 15-ianni sisorariartortarfimmeereerluni angerlarnerminit ullut pingasut qaangiuttut quersorluni napparsimalerpoq.
Angajoqqaat coronavirus pillugu meeqqaminnut qanoq oqaloqatiginninnissaannut siunnersuutitsialaat:
* Danmarkimi oqartussaasut virusip Danmarkimi siaruaatinnginnissaa sulissutigingaatsiaraat erseqqissaatigiuk.
* Nunarsuaq tamarmi ajornartorsiutaasumut aaqqiissuteqaqataaniartoq nassuiaatigiuk.
* Naatsunik ersarissunillu akissuteqarit. Pisut annilaarnangaatsiartut eqqartoqqissaarnissaat paasissutissalluunniit annertunaarnissaat pisariaqanngilaq.
* Tusakkiakkat naqqikkit. Meeqqavit tusatsikkat sumi tusarsimanerai paasiniaruk tusatsiakkallu piviusumut ataqatigiinnginnerat naqqiissuteqarfigiuk.
* Meeqqat sapinngisamik paasissuteqarfiginaveersaaruk. Meeqqat mikisut coronavirusi pillugu paasissutissiissuteqarfiginissaat pisariaqanngilaq.
* Nutaarsiassat isumatusaartumik atukkit. Meeqqat annerit inersimasumik, paasissutissanik sukuiaanermi nassuiaateqarsinnaasumik taamaallaat ilaqarlutik isiginnaasariaqarpaat.
* Tamanna oqaloqatigiinnermut atoruk. Nappaatit qangaanerusoq siaruaatiinnarsinnaatinneqartarmata ulorianarnerujussuusimasut nassuiaatigiuk. Pisimasut maannammut ilikkagaqarfiunikuupput nappaatillu tuniluunnissaata killilersimaarneqarnissaa ilikkarneqarnikuulluni.
Tusarfik: Unicef
Tunillatsissimasoq nammineq nakorsaminut februaarip 27-anni saaffiginnippoq, Rigshospitalimullu tamatuma kingorna innersuunneqarluni.
AAMMA ATUARUK Danskimik coronavirusimik tunillanneqarsimasumik siullerpaamik siumuisoqartoq
Danskeq coronavirusimik tunillatsissimasoq siulleq sisamanngornermi uppernarsarneqarpoq. Taanna Italiap avannaani sisorariartortarfimmi aamma tunillatsissimasoq paasineqarpoq. Italiap avannaa Europami virusip tuniluunnerpaaffigaa.
Tunillatsissimasup nutaap Danmarkimi Peqqinnissamut Aqutsisoqarfiup virusimik pakkersimaariniarnerannut allannguinngilaq.
- Covid-19-ip tuniluunneranik sukkasuumik pakkersimaariniaannassaagut, tunillatsissimasorlu mattullugu nakorsassallugu, Peqqinnissamut Aqutsisoqarfiup pisortaa, Søren Brostrøm tusagassiuutinut nalunaarummi allappoq.
Tunillatsissimasup aneqqusaanani mattussaaqqanerata saniatigut tunillatsissimasup naapitarisimasai ujartorneqassapput.
Tunillatsissimasoq Napparsimasut isumannaanneranut Aqutsisoqarfimmit angerlarsimaffimminit aneqqusaajunnaarsinneqarpoq. Aqutsisoqarfiup tunillatsissimasup naapissimasai ujartorlugit aallartippaa.
Tunillatsissimasoq pillugu tallimanngornermi ualikkut annertumik paasissutissaqanngilaq. Taamaammat tunillatsissimasup qassinik ukioqarnera, suiaassusaa, maannamullu sumi najugaqarnera ilisimaneqanngilaq.
AAMMA ATUARUK Danskip tunillatsissimanera nunatsinni upalungaarsimanermut allannguinngitsoq
Danmarkimi inuit ikinnerpaamik 180-it coronavirusimik tunillatsissimanersut misissorneqareerput. Qasseerpassuillu tunillatsissimasumik naapitaqarnikuunertik pissutigalugu angerlarsimaffimminnit aneqqusaanngikkallartinneqarlutik.
Taakkuani TV2-mi sulisut 16-it ilaapput. TV2-mi sulisoq danskini tunillatsissimasuni siulliusoq sisamanngornermi paasineqarpoq.
Peqqinnissamut aqutsisoqarfiup Danmarkimi coronavirusimik tunillatsittut amerlanerunissaat naatsorsuutigineqartoq, danskit nalunaaqutaat naapertorlugu ullup-qeqqata nalaani tallimanngornermi nalunaarutigaa.
Peqqinnissamut aqutsisoqarfiup oqarnera naapertorlugu nunarsuarmi tamarmi tunillatsissimasut maanna 85.000-it missaanniipput, 3000-illu missaanniittut virusimik toqussuteqarlutik.
Taamaammat coronavirusimik toqquteqartut tunillatsissimasunut sanilliullugit ikittunnguamik procenteqarput.
/ritzau/
