Danskimik coronavirusimik tunillanneqarsimasumik siullerpaamik siumuisoqartoq
Danskeq coronavirusimik tunillanneqarsimasoq siulleq siumorneqarpoq.
Danmarkimi peqqinnisaqarfik tusagassiutinut taama nalunaaruteqarpoq.
- Nappaatip Danmarkimi siaruaatilertornissaa sapinngisarput tamaat pinngitsoortinniarparput, peqqissutsimut ministeri Magnus Heunicke oqarpoq.
Tunillatsissimasoq Italiami feriarsimasoq
Nualluummik tunillanneqarsimasoq TV2-mi sulisuusoq, TV2-p nalunaarutigaa. Taassuma ilaquttani ilagalugit Italiap avannarpasissortaani sapaatip-akunnerata siuliani sisorariaqatigai.
Inuit nualluummik coronavirusimik Europami tunillanneqarsimasut akornanni amerlasuut Italiap avannarpasissortaani siumorneqarsimapput.
TV2-mi sulisoq tv-qarfiup Københavnimi immikkoortortaqarfiani ippassaq pingasunngornermi sulisimavoq, tassa nualluummik tunillanneqarsimasutut suli paasineqanngitsoq.
Tunillanneqarsimasup kikkut qanittumik attaveqarfigisimanerai, napparsimasut isumannaatsuunissaat pillugu Danmarkimi aqutsisoqarfiup maanna paasinialeruttorpaa.
TV2-mi sulisoq aneqqusaajunnaarallartinneqartoq
Tunillanneqarsimasup nulia erneralu coronavirusimik tunillanneqarsimanngitsut, TV2-p allaaseraa.
Nappaatip tuniluutilersinnaanissaa aarleqqutigineqarmat, TV2-mi sulisoq taanna Sjællandimi angerlarsimaffimminiiginnartussanngortinneqartoq, TV2-p allaaseraa.
Inuit nunarsuaq tamakkerlugu ikinnerpaamik 82.000-it coronavirusimik tunillanneqarsimapput, taakkunanngalu 32.000-nit amerlanerusut katsorsarneqarsimallutik.
Inuit 2800-nit amerlanerusut coronavirusimik maannamut toqquteqarsimapput. Tassa tunillanneqarsimasut akornanni procentialuinnaat virusimit toqquteqarsimallutik.
