Dansk Metal Air Greenlandimut isumaqatiginninniarnermut: Naaperiutissarsiorpugut
Nunatta silaannaani timmisartut aappaluttut apriilip ulluisa aqqarngata kingorna suli takussaassaneri nalunarpoq.
Timmisartumi mekanikerit aningaasarsiaat pillugit Air Greenland Dansk Metalilu suli aaqqiissuteqanngillat. Paasissutissanillu suli iluamik oqaaseqarumanatik.
AAMMA ATUARUK Air Greenlandip timmisartumilu mekanikerit isumaqatigiinniarnerat ullumi aallartittoq
Sulisut peqatigiiffiat Dansk Metal Air Greenlandilu suliumajunnaartoqarnissaanik mattussinissamillu marsip qiteqqunnerani aarlerisaaruteqaramilli aatsaat siullermeertumik naapissaput.
- Torersumik oqaloqatigiippugut, illuatungeriillu naaperiutissarsiorput, Ole Rosschou KNR-imut oqarpoq. Taanna Dansk Metalimiit isumaqatiginninniartuuvoq.
- Tamatta qiimavugut aaqqiissutissarsiorlutalu.
Aaqqiagiinniarnerit ingerlatillugit timmisartuutileqatigiiffik tusagassiutinut oqaaseqassanani aalajangersimallugu Air greenland KNR-imut paasissutissiivoq.
Aaqqiagiinnginneq aningaasarsianut tunngassuteqarpoq
Illuatungeriit Københavnimi isumaqatigiissitsiniartarfimmi ullaap tungaa aqqarngup qeqqartoq aaqqiagiinnertik pillugu naapipput.
Isumaqatigiissitsiniartarfik
- oqartussaavoq sulisitsisut sulisullu nutaamik isumaqatigiissuteqarnissamut isumaqatigiissinnaanngikkaangata akuliuttartoq.
- aaqqiagiinnginnerit aamma suliumajunnaarnerit mattussinerillu pinngitsoortinnissaannik sulissuteqartarpoq.
- illuatungeriit isumaqatigiinniarnissaannut pinngitsaaliisinnaavoq, akornannilu isumaqatigiissitsiniartuusinnaalluni.
- suliujumajunnaarnissat mattussinissallu sapaatini akunnerni marlunni kinguartinnissaanut pisinnaatitaaffeqarpoq.
- Sankt Annæ Pladsimi Københavnimiippoq.
Paasissutissarsiffik: forligsinstitutionen.dk
Isumaqatigiinngissutaasoq akissarsianut isumaqatigiissummullu qaangiussimasumut tunngassuteqarpoq. Timmisartumi mekanikerit Air Greenlandip akissarsiaritinniagaanit annerusumik akissarsiaqarusupput.
Taamaammat Dansk Metalip timmisartumi mekanikerit apriilip ulluisa qulingiluaannit timmisartorsuarmi Kangerlussuup Københavnillu akornanni angalasartumi sulinerminnit suliumajunnaarniartut oqaatigaa.
Timmisartorsuarmi mekanikerit marluk sulisarput. Naalli inuit marluk kisimik suliumajunnaarniaraluartut tamanna aqqummik matusinermik kinguneqassaq.
Air Greenland akissuteqarluni timmisartuutileqatigiiffiup timmisartumi mekanikerimi sinneri akissarsiaqartinnagit apriilip ulluisa aqqarnannit angerlartinniarpai.
Taamaalillunilu nunatta iluani timmisartuussineq aamma matuneqassalluni.
Aaqqiagiinnginneq sivitsortuussappat allanik suliaqartut aamma eqqugaasinnaapput.
Air Greenlandimmi timmisartuutileqatigiiffiup sulisut sulianik peqatigiiffinnut allanut atassuteqartut aaqqiagiinnginneq piviusunngorluassappat timmisartumi mekanikerinut tapersersuillutik suliumajunnaarniarnissaat naatsorsuutigalugu pingasunngornermi nalunaarutigaa.
Taamaammat Air Greenlandip timmisartumi aquttut angallannermilu sulisut aamma mattunniarpai – tassa akissarsiaqartinnagit angerlartinniarpai. Mattussineq Dansk Metalip suliumajunnaartoqarnissaanik ulluliineranit sapaatit akunneri pingasut qaangiunneranni pissaaq.