Nuugaatsiaq: Millionit koruunit sunngiffimmi pinialuttartunut tunissutigineqartut

Nuugaatsiameersut sunngiffimmi pinialuttartut sisamat angallatsinik aalisariutinik, umiatsiaaqqanik piniarnermullu atortussanik aningaasaateqarfimmit KrogagerFondenimit Pisiffik ikiortigalugu sapaatip akunnerata siuliani tunissuteqarfigineqarput.

Sunngiffimmi pinialuttartunut tapersiinissaq aningaasaateqarfiup toqqarpaa, ajunaarnersuup kinguneranik annaasaqartut taarsiiffigineqarsimanngimmata, aningaasaateqarfimmi, KrogagerFondenimi siulittaasoq Rune Knude oqarpoq.

- Nunani allani navianartorsiorfiusuni ajunaarnersuaqarfiusunilu siornatigut ikiuuttarpugut,
immikkulli uani naalagaaffeqatigiinnerup iluani inunnut ajornartoorluinnartunut qanimut ikiuunnissarput nukinginnarluinnartut isigivarput, aningaasaateqarfimmi siulittaasoq, Rune Knude Pisiffiup tusagassiuutinut nalunaarutaanni taama oqarpoq.

KrogagerFondenip nunatsinni suliffeqarfiit arlallit suleqatigivai. Royal Arctic Linelu Aalborgimit Uummannamut assartuinermut aningaasaliisuuvoq, Siriusikkut immikkut ittumik piumasaqaateqartoqarnera malillugu aamma tunniussillutik, Pisiffillu ataqatigiissaarinissamut akeqanngitsumik sullississalluni.

Aningaasaateqarfik Eilif Krogagerimit pilersinneqarpoq, taassumalu Tjæreborg Rejser 1950-imi pilersissimallugu.