Dansk Folkepartiip Kalaallit Nunaat USA-mut tunerusuppaa

Kalaallit Nunaata naalagaaffeqatigiinnit aniniarluni kingullertigut oqaaseqartarnera tamatumunnga pissutaavoq, Dansk Folkepartiimmi taamatut pissusilersortoqarnera qatsuppaa. Partiip ajornassanngippat Kalaallit Nunaat USA-mut tunineqarnissaa sulissutiginialerpaa, soorlu aamma ukiut 100-t matuma siorna St. Croix, Sr. Jan aamma St. Thomas taamatut pineqartut.

DF malillugu Kalaallit Nunaata Naalagaaffeqatigiit ilaatut ingerlanneqarnera aningaasartuutaannaavoq. Aningaasallu atorneqartartut Danmarkimi atugarissaarnerup qulakkeerniarneqarnissaanut atorneqarnissaat Dansk Folkepartiip pilersaarutigaa. Aammattaaq aningaasat amerikamiunit pissarsiarineqartut politiit pinerlunniaqatigiinnik akiuiniarnissaannut Danmarkip atorsinnaakutsoorpai.

-Ukiorpassuarni oqaluuserisarparput, aamma Foghip ministeriunerata nalaani Kalaallit Nunaata USA-mut tunineqarnissaa eqqartortareerparput. Isumaqatigiinniutiginikuunngilarput, Kalaallit Nunaatali taama ittunik naalakkersuisoqalernera pissutigalugu nunanut allanut ministeri John Kerry qanittukkut oqaloqatigissamaarpara, Senatimi pilersaarutit isummerfigitinnissaat isumaginiassammagu, Søren Espersen knr.gl-imit apersorneqarluni oqarpoq.

Danskit Folketingianni suli qaqinneqarnikuunngimmat Kalaallit Nunaata tunineqarnissaanut Danmarkimi amerlanerussuteqartoqarnersoq ilisimaneqanngilaq. Socialdemokraatilli Venstrellu Naalagaaffiup karsiata amerlanerusunik isertitaqarnissaa eqqarsaatigalugu isumaqataanissaat naatsorsuutigineqarpoq, Dansk Folkepartiilu peqatigalugu partiit taakku marluk Danmarkimi inatsisartuni amerlanerussuteqarsinnaapput.

-Amerikamiutut innuttaassuseqalernissaq pingaartumik Partii Inuit tungaaniy ilassilluarneqarnissaa qularutiginngilara, taakkumi danskisut oqalukkusunngillat. Taamaasillutik tuluttut oqalussinnaalissapput, taamaattumillu tamanit nuannaarutaanissaa aamma ilimanarpoq. Kalaallit Nunaata tunineqarnera danskinit maluginiarneqarpallaannginnissaa ilimagaara. Assammik arsarluni nunarsuarmi pissartanngorniunnerit nalaanni tunineqarnissaa isumagiinnassavarput, taava tunineqarnera paasineqarnavianngilaq, kalaallit folketingimut ilaasortaatitai marluk eqqaassanngikkaanni, taakkulu pissusissamisoortumik suliffissaaruttussaassapput, Søren Espersen, ullumikkut apriilip aallaqqaataani taama oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat