Politikki

Danmarkip timmisartui sorsuutit arfineq-marluk USA-miitinneqassasut

Timmisartut sorsuutit nutaat 27-usut ilaat arfineq-marluk danskit naalakkersuisuisa USA-mi Floridamut nassiutissagunarpaat. Timmisartut nunat tamalaat timmisartortartunik sungiusaanerannut 2027-p tungaanut atorneqassapput.

Allattoq Helle Nørrelund Sørensen

januaarip 05-at 2018 13:03

Nutserisoq Simon Uldum -

Jyllands-Posten taama allaaserisaqarpoq.

Sakkutuut timmisartortartut taamaalillutik timmisartut sorsuutit 20-nnaat Danmarkimi atugassarilissavaat. Tamannalu immikkut ilisimasalinnit arlalinnit isornartorsiorneqarpoq, ilaatigut Forsvarsakademiip lektorianit Peter Viggo Jakobsenimit.

- Timmisartut USA-mut nassiunneqartussat amerlavallaarput. Danmarkip naammassisaqarsinnaassusia taamaalilluni ullumikkumut naleqqiullugu millissaaq, aviisimut taama oqarpoq.

AAMMA ATUARUK Timmisartut sorsuutit naatsorsuutigisamit ajornerupput

Suliassat naammassineqarsinnaasariaqartut ilaatigut tassaapput Issittumi nakkutilliinermik suliassat Kangia qiterlermilu sakkutooqarnikkut suliassat.

Illersornissamut ministerip Claus Hjort Frederiksenip ilisimatitsissutigaa timmisartunik sorsuutinik arfineq-marlunnik USA-miititsinissaq inaarutaasumik suli aalajangiiffigineqanngitsoq - periarfissaasorli.

Danmarkilli sakkutuuisa timmisartortartut pilersaarutaannik sanngiillisitsissasorinngilaa.

- Taamatut aaqqiissuteqartoqarnera timmisartut ingerlaartarnissaannut pilersaarutaareersunut politikkikkullu suliakkiissutigineqartunut allannguuteqartitsissanngilaq, illersornissamut ministeri Jyllands-Postenimut akissuteqarluni taama allappoq.

Timmisartunik sorsuutinik nutaanik 27-nik pisineq 16 milliardit koruunit missaannik naleqarpoq naalagaaffiullu pisiortugaani akisunersaalluni.

AAMMA ATUARUK Ministeri timmisartut sorsuutit pillugit nassuiaateqartusaanngortoq

Danmarkip timmisartui sorsuutit arfineq-marluk USA-miitinneqassasut

Aamma atuaruk