Danmarkip inatsiseqarnermut ministeria: Pusher Street ukioq manna matuinneqassaaq

Københavnimi Christianiami aqqut ilisimaneqarluartoq, Pusher Street, 2024-p ingerlanerani matuinneqassaaq.

Danmarkip inatsiseqarnermut ministeria, Peter Hummelgaard (S), TV2-p immikkoortortaanut TV2 Kosmopolimut taama erseqqissaavoq.

Ikiaroornartumik hashimik Pusher Streetimi tuniniaasarnerup unitsinneqarnissaanut Danmarkimi naalakkersuisut pilersaarutaannut atatillugu Peter Hummelgaard aatsaat taama erseqqitsigisumik oqaaseqarpoq, sulili ulluliiniarnani.

Pusher Street kommuni Christianiamiullu peqatigalugit matuneqassasoq nalunaarutigineqarpoq.

Pusher Street atajuartumik qanoq iliornikkut matuniarneqarnersoq, inatsiseqarnermut ministerip itinerusumik oqaaseqarfiginngilaa.

Politiilli annertunerusumik Christianiamiittalernissaannik kinguneqassasoq nassuerutigaa.

Christianiamiut Pusher Streetip nalaa pillugu siunissamut takorluugaat sapaammi akuersissutigineqareersorlu, Pusher Streetimi tuniniaaviit ukioq manna apriilimi piiarneqalissapput.

Pusher Streetip nalaa taarsiullugu piorsarsimassutsikkut pikiliaarfittut sanaartorfiusutullu Christianiamiut siunissami atorniarpaat. TV2 Kosmopol taama allappoq.

Pinerlunniaqatigiit Hells Angelsikkut Loyal To Familiakkullu akornanni siorna aasakkut ukiakkullu aaqqiagiinngissuteqartoqareersorlu ikiaroornartumik Christianiami tuniniaaneq ukkatarineqarnerulerpoq. Pinerlunniaqatigiit aaqqiagiinngissuteqarnerat Christianiamiullu tamanna sunnerneqaatigalugu.