Danmarkip Avannaani EU-p allaffianut Sermersooq ilaasortanngulersoq
Danmarkip Avannaani EU-p allaffia peqatigiiffiuvoq Jyllandip avannaani suliffeqarfinnut, ilinniarfinnut, innuttaasut piginnaasaasa siuarsarneqarnissannut, isorliunerusut siuarsarneqarnissaannut, kommuninut aamma Region Nordjyllandimut aningaasaliissutinik arlalinnik aningaasaliissuteqartarnernut tunngaviusartoq. Allaffik Bruxellesimi amma Jyllandip avannaani allaffeqarfeqarpoq. Kommuneqarfik Sermersooq nittartakkamini taama allaaserisaqarpoq.
- Ilaasortanngornermi anguneqassaaq Kommuneqarfik Sermersuup nunarsuatta sinneranut attaveqarnerata pitsaanerulernera. Aamma anguneqassalluni ilinniarfiit aningaasanik pisariaqartitsisut aningaasaliissutinik qinnuteqartarnerisa ajornannginnerulernissaa taamatullu kommunitsinni pisariaqartitavut allat siuarsarneqartariaqartullu pillugit europami nunat ilaasortaasut innuttaasa ilaat immikkut ilisimasallit, suleqatigisarnissaasa ajornannginnerulernera, Kommuneqarfik Sermersuup borgmesteria, Asii Chemnitz Narup oqarpoq.
Kommuni periarfissagissaarnerulissasoq
Kommuneqarfik Sermersuumit nalilerneqarpoq, ilaasortanngornermi nunat allamiut kikkut aningaasaliisinnaanersut kommunimit ilisimasaqarfigineqarnerulernissaat anguneqassasoq taamatullu attaveqartarnerit ilisimasallu – tassani pingaarnerulluni suliniutinut nutaanut ilisimasat, soorlu EU-mit tamakku pingaartillugit suliniutigineqartartut.
- EU-mut Nunarput ilaasortaanngikkaluartoq, taamaattoq naatsorsuutigisinnaavarput EU-mut aningaasanik qinnuteqartarnissatta tunngavilerneqarnissaa, soorlu nunat maanna ilaasortaareersut suliffeqarfinnut, ilinniarfinnut Danmarkimilu kommunut iluaqutaasunik aningaasanik millionerpassuarnik aningaasaliiffigineqartareersut, borgmesteri oqarpoq.
Danmarkip Avannaani EU-p allaffianut ilaasortaaneq ukiumut 44.000 koruuninik, tassa agguaqatigiissillugu Kommuneqarfik Sermersuumi innuttaasumut ataatsimut 2 koruuninik akeqassaaq.
