Kielsen: Danmarkip akisussaaffimmik tigusinera nuannaarutigaara

Amerikamiut Nunatsinni sakkutooqarfigisimasaanni saliinissaq Danmarkip akilerniarpaa. Naalakkersuisut Siulittaasuat Kim Kielsen ministeriunerlu Lars Løkke Rasmussen naalagaaffeqatigiinneq pillugu Danmarkimi ullumi ataatsimeeqatigiinnerminni saliinissamik atsioqatigiillutik tamanna siunertaqaqatigiinnermik isumaqatigiissutigaat.

- Uani nuannaarutigivara aamma qallunaat naalakkersuisuisa akisussaaffik kiisami tiguaat suleqataalerlutillu, Naalakkersuisut siulittaasuat, Kim Kielsen, oqarpoq.

USA-p nunatsinni sakkutooqarfigisimasaani qimaannakkani saliinissaq nunatta ukiorpassuanngortuni piumasaraa.

AAMMA ATUARUK USA-p qimataanik saliinissaq Danmarkip akilerniaraa

Danskit saliinissamut ikinnerpaamik 150 millionit koruunit atussagaat, Naalakkersuisut siulittaasuat danskillu ministeriat siunniussat pillugit nalunaarummik ullumi pingasunngornermi atsioqatigiissutigaat.

Saliinissamut 2018-i aallarnerfigalugu ukiuni tulliuttuni tallimani ukiumut 30 millionit koruunit aningaasaliissutigineqartassapput, pisariaqarpallu saliineq sivitsorneqarsinnaavoq.

Taamaalitinnaguli Folketingi akuerseqqaartariaqarpoq.

- Uunga aningaasaliinissatut missingiussannut Naalakkersuisut Folketingimit taperserneqarsinaassasut soorunalimi neriuppunga, taamaalilluta una suliassaq naammassivillugu naammassiniassagatsigu, ministeriuneq, Lars Løkke Rasmussen, DR-imut oqarpoq.

Isumaqatigiissullumi suli siunertarissaarutaannaavoq. 

- Nappartaq ataaserluunniit suli peerneqanngilaq. Suliassaq pimoorullugu tassani takussavarput aappaagu tamakkuninnga piiaasoqalerpat. Kisianni aningaasat tungaatigut 30 millionit koruunit ukiumut immikkoortinniarneqarneri takutippaa qallunaat tassani pimoorussisut.

AAMMA ATUARUK Kangilinnguani saliinissaq aallartinneqarsinnaanngulersoq

Vittus Qujaukitsup nunanut allanut tunngasunut naalakkersuisuunermini siorna oqaatigaa, nunatta saliinissamik kissaatai soqutigineqanngippata Kalaallit Nunaat Naalagaaffeqatigiinniit ilaajunnaassasoq USA-lu Pituffimmiit anissasoq.

Saliinissamulli isumaqatigiissuteqarnermik Vittus Qujaukitsoq kisimiilluni sunniuteqanngitsoq, siulittaasoq erseqqissaavoq.

- Politikkikkut tamakkua ukiorpassuarni eqqaaneqartarput. Vittus, uanga, tamatta issiasuusugut issiareersullu tassuunartaatigut sunniuteqarniartarsimavugut. Kisianni aatsaat massakkut atsiortoqarpoq, Naalakkersuisut siulittaasuat, Kim Kielsen, oqarpoq.

Isumaqatigiissutip inaarutaasup ukiaru atsioqatigiissutigineqarnissaa naatsorsuutigineqarpoq.