Danmarkip aalajangiiffigissavaa Kalaallit Nunaat uranimik piiasinnaassanersoq
- Naalagaaffeqatigiinnut ilaatillugit, nunanut allanut sillimaniarnermullu politikki suli danskit folketingiata ataaniippoq. Kalaallit Nunaata taasititsinikkut uranimut akuersaanngilluinnarnissaq atorunnaarseriarpassuk, nutaamik pissanganartumillu aammalu ajornakusoortumik inissisimalissaagut. Kalaallit Nunaata uranimut avammut nioqquteqartartunngorusuppoq, illuatungaatigullu danskit politikeriisa tamanna akuerineqassanersoq aalajangiiffigisussaassavaat, kontreadmirali illersornissamullu akademimi pisortaq Niels Wang Dagbladet Informationimut oqarpoq.
Nils Wang naapertorlugu uraminik avammut nioqquteqalerneq Danmarkiip isumaqatigiissutinut nunat tamalaallu isumaqatigiissutaannut inissisimaneranik allanngortitsilluinnassaaq. Kalaallit uranisiorniarnerannut tunngatillugu aamma allamik tikkuagaqarpoq. Tassalu aningaasaqarniinnaq pineqanngimmat aammali pilersaarusiornikkut soqutigisat pineqarmata.
-Kinamiut aatsitassanik qaqutigoortunik kisermaassinerisa atorunnaarsinnissaa kissaatigineqartupilussuuvoq, Kuannersuarnilu aatsitassat ima annertutigaat, allaat kisermaassineq taanna atorunnaarsinneqarsinnaassalluni. Taannalu immaqa tunngavilersuutiginiarneqarsinnaavoq. Tassalu kinamiut kisermaassineriat atorunnaarsinniarlugu ajunngitsuliorluta uranik piaalissasugut, Nils Wang oqarpoq.
