Danmarkimit akissut: Inuussuttuaqqat aalisakkerivinni sulisinnaapput

Inuusuttuuguit 15-it 18-illu akornanni ukioqarlutit aalisakkerivinni aasaanerani atuanngiffeqarninni sulisinnaanngorputit.

Tamanna suliffeqarnermut ministerip suliffeqarnermut naalakkersuisumut, Jess Svanemut (Siumut) uppernarsarpaa.

Suliffimmi avatangiisit danskit akisussaaffigaat. Taamaammat suliffeqarnermut naalakkersuisup, Siumumeersup, Jess Svanep, inuusuttut soorlu aalisakkerivinni savimmik atuiffiusuni sulinissaat ilumut inerteqqutaanersoq inatsillu qanorpiaq paasineqassanersoq, danskit sulinermut ministereqarfianut apeqqutigaa.

Sukassuseq, nakkutiginninneq inerisimanerlu

Akissullu maanna piareerpoq. Inuusuttut 15-it 18-illu akornanni ukiullit suliffeqarfinni savimmik atuiffiusuni sulisinnaapput.

- Sulineq eqqissisimasumik pippat, nakkutigineqarluarpat inuusuttullu qanoq inerisimatiginera isiginiarneqarpat, inuusuttoq sullivimmik pineqartorpiamik naliliineq aallaavigalugu aalisakkerivimmi savissorluni sulisinnaavoq, Sulisoqarnermut maanna ministeriugallartoq, Peter Hummelgaard, Jess Svanemut taama allappoq.

Tamanna KNR-p sulinermut ministereqarfimmit allagaatinik pissarsiaani allaqqavoq.

AAMMA ATUARUK Ny fiskefabrik i Oqaatsut beskæftiger 20 procent af bygden

Inuusuttut aalisakkerivinni sulinissaat politikerinit maanamut inerteqqutaasorineqarpoq.

- Tassunga paasinninnerup tunuatungaaniittut, qanoq ittuuneri imaassinnaavoq misissuinermi taakkua takunngittuutsiarneqarsimasut, Jess Svane KNR-imut oqarpoq.

Allatut oqaatigalugu tassa inatsit iluamik paasineqarsimanngilaq. Inerteqqutaaneraasarsimaneq eqqunngilaq.

"Ajoqutissaasinnaasoqanngitsoq"

Naalakkersuisulli maanna paasinnissimaleramik inuusuttuaqqat suliumassusaannut tamanna pitsaasumik kinguneqarnissaanik neriupput.

- Ajoqutissaasinnaasunik takusinnaasorinngilanga. Kisiannili siunissamut sulerusussutsimik kinguneqariartorsinnaanissaa uanga neriuutiginerpaavara, Jess Svane oqarpoq.

Kalaallit Nunaanni naatsorsueqqissaartarfiup kisitsisaatai naapertorlugit meeqqat 15-it 18-illu akornanni ukiullit 2800-nit amerlanerupput.