Oqaatsormiut 20 procentii tunisassiorfittaami sulisut

Ilulissanit 12 kilometerisut avannarpasitsigisumi, 30-llu missaannik inulimmi, Oqaatsuni, qaleralinnut tunisassiorfik nutaaq, Rodebay Fish-imit pigineqartoq sapaatiummat ammarpoq.

Tunisassiorfittaap illutaa atortuilu nutaajusut, tunisassiorfitoqqamili matuneqarnikumi toqqaveqartoq, tunisassiorfimmi pisortaq oqarpoq.

- Nunaqarfimmi tunisassiorfiup ammaqqinnera innutaasunit assorujussuaq nuannarineqarlunilu qilanaarineqarpoq, taamaalillutik siunissami suliffissaqalerput. Suliffissaqalernertillu taanna assorujorujussuaq toqqissisimanaraat nuannaralugulu, Knud Fleischer KNR-mut oqarpoq.

Tunisassiorfiup qalerallit 4-5 tonsit maanna ullup unnuallu ataatsip iluani tigoorarsinnaavai, sulisullu arfinillit tamarmik Oqaatsormiuupput.

- Piffissami aggersumi soorunami imaassinnaavoq pisariaqartitsineq tulaassuinerunerlu annertunerulissappat, taava inunnik amerlanernik atorfissaqartitsilernissarput naatsorsuutigaarput.

Tamatumuuna qullukkiussanngitsut

Rodebay Fish unammlleqatigiinnermik peqqutilimmik siusinnerusukkut matunikuugaluarpoq. Ingerlatseqatigiiffissuaq Polar Seafood maanna piginneqataavoq.

Tunisassiorfik siulleq ammagallarmat qullukkiortoqartarpoq, inuit tamanna suli apersuutigisaraat pisortaq oqarpoq. Taakkuli Oqaatsuneersunik qullugartoqqinnissartik ilimagissanngilaat.

- Qullukkioqqissanngilagut. Piginnittut aalajangiussaat taanna naapertorlugu qaleralinnik tigooqqaaginnarneq maannakkut ingerlatissavarput, allanngortitsisoqarnissaata tungaanut, Knud Fleischer oqarpoq.