Danmarkimi tunillatsissimasutut ullormut paasineqartut aatsaat taama ikitsigeqqittut
Coronavirusimik tunillatsissimasut aasaanerani ikipput, tunillaassuuttoqarneranilli kisitsisilerinermik immikkut ilisimatusarsimasup virusi indiami allanngortoq nakkutilluarpaa.
Danmarkimi coronamik tunillatsissimasutut ullormi kingullermi paasineqartut nutaat septembarimi kingullermik taama ikitsigipput.
Tamanna Statens Serum Institutimit kisitsisit ataasinngornermi takutippaat.
Ritzau taama allaaserisaqarpoq.
Kunngeqarfiup kujasinnerusortaani coronamik tunilatsissimasut nutaat sapaammi katillugit 237-upput. Tunillatsissimasutut ullormut paasineqartut kingullermik taama ikitsigigamik septembarip ulluisa arfineq-aappaanni 230-upput.
AAMMA ATUARUK Naalakkersuisup sukkanerusumik akiuussusersuinissaq kissaatigigaluaraa
Tunillatsissimasut nutaat ikinnerat PCR-mik sapaammi misiliuteqarnernut sanilliunneqassapput. PCR-imik misiliuteqarnernit, 67.596-init tunillatsissimasut 237-upput.
- Coronamik tunillatsissimasut piffissami sivisunerulaartumeersut tassa ulluni kingullerni qulinit 14-inut misissoraanni tunillatsissimasut ikileriangaatsiarsimapput.
- Kisitsisit maanna takusinnaasagut naatsorsuutigisatsinnit ukiup qanoq inneranit sunniuteqarfigineqarnerupput, Roskilde Universitetimit tunillaassuuttoqarnerani kisitsisilerinermik immikkut ilisimatusarsimasoq, Viggo Andreasen oqarpoq.
Aasaanerani illup iluaniinnermit silamiinnerusoqarnerunerani virusip tuniluutinnginnerunera taassuma unnersuussutigaa.
Danmarkimi coronavirusimik tunillatsissimasunit 102-t napparsimmavimmi piffissami matumani innangapput.
Tunillatsissimasunit ataatsimik akunnerit 24-t kingulliit ingerlaneranni toqquteqartoqarpoq. Taamaalilluni nunarsuaq tamakkerlugu tunillaassuuttoqalerneranit maannamut katillugit 2526-t virusimik toqquteqarput.
Indiamit allanngortoq
Coronavirusilli akiorniarnera pitsaamik ingerlagaluartoq Viggo Andreasenip indiami virusi allanngortoq Tuluit Nunaannilu tuniluutileruttortoq nakkutigaa.
- Virusi taanna maanna tuniluunnerusumit tuniluutianeruvoq, Viggo Andreasen oqarpoq.