Danmarkimi professori: Nunani avannarlerni suleqatigiinneq nukittorsartigu

Aarhus Universitetimi professori Michael Böss, aviisimi Politikenimi ullumi ilaatigut taama allaatigisaqarpoq.
 
Nunat avannarliit qanoq ilillutik illersornissaq isumannaallisaaniarnerlu pillugu suleqatigiinnerusinnaanersut pillugu ataatsimiititaliarsuarmik suligasuartussamik pilersitsinissaat, Norgep nunanut allanut tunngasunut ministererisimasaata Thorvald Stoltenbergip siorna ukiakkut siunnersuutigereeraalu professori Michael Böss tapersersuilluni taama allaatigisaqarpoq.
 
Ruslandip Ukraine pillugu aaqqiagiinngissuteqarnera ilaatigut pissutaalluni nunanut killernut attaveqarnera aamma killeqalersimavoq, nunallu avannarliit taamaammat suleqatigiinnerusariaqartut Stoltenbergip kissaatigaa, Kalaallit Nunaatalu matumani peqataanissaa Michael Bössip aamma siunnersuutigaa:
 
- Danmarkip Naalagaaffeqatigiit sinnerlugit illersornissaq isumannaallisaaniarnerlu pillugu suleqatigiinnissamut peqataanissaa pingaaruteqartoq isumaqarpunga. Kalaallillu Nunaata Savalimmiullu ataatsimiititaliarsuarmi peqataanissaat pissusissamisuuginnassasoq isumaqarpunga, Kalaallit Nunaat Savalimmiullu siunnersuusiornermut peqataasinnaaniassammata. Islandimi peqatigalugu Atlantikup Avannaani Issittumilu taakku inissisimassapput, Michael Böss ilaatigut allappoq.
 
Kalaallit Nunaata Savalimmiullu Nunat Avannarlernik suleqateqarnerulersinnaanerat Ruslandimik aaqqiagiinngissuteqarnerulernissamik siunertaqanngitsoq, Thorvald Stoltenbergip siusinnerusukkut aamma oqaatigereerpaa. Putinimilli qanimut oqaloqateqalersinnaanermik nassataqartussaalluni, tassami Atlantikup Avannaani Issittumilu pissutsit pillugit suleqatigiittoqalersinnaanera aamma takorloorneqarsinnaammat, Stoltenberg oqarpoq.