Danmarkimi palaseqalernissaq neriunarpoq
Aleqa Hammond aviisimut oqarpoq, Helle Thorning-Schmidtip palasitut atorfik, aningaasanut inatsimmi, sapaatit akunneri arlaqartut qaangiuppata saqqummiunneqartussami ilaatinneqassasoq.
Nunatsinni Naalakkersuisut 2010-mi atorfik, 2011-mut aningaasanut inatsimmit peerniarlugu aalajangermata, kalaallit Danmarkimi palaseqartinneqarnerat oqallisaaqqilerpoq. Taamatut pilersaaruteqarneq taamaatiinnarneqarpoq, taamaattorli kalaallit Danmarkimi palasiata Jens Kristian Kleistip, kalaallit nammineq piumassuserinngisaminnik Danmarkimiittut kisiisa sullisissagai aalajangiunneqarluni.
Kalaallit namminneq piumassutsiminnik Danmarkimiittut kalaallisut katinniarunik, apersortitsiniarunik imaluunniit ilisiniarunik, tamatumunnga immikkut ittumik qinnuteqaateqartariaqarput.
- Palasi siornatigut Danmarkimi angalalluni palasitut suliassaminik isumaginnittaraluarpoq, maannali aaqqissuussineq allaffissornerujussuuvoq. Atorfik Danmarkimit aningaasalersorneqalerpat aaqqissuussineq immaqa eqaannerusunngortinneqarsinnaavoq, Bitha Metelmann kalallit peqatigiiffiisa kattuffianni Inuit-mi siulittaasoq Kristeligt Dagbladimut oqarpoq.
Danmarkimi ilagiinnut siusinnerusukkut ministeriusoq Birthe Rønn Hornbech ilagiit kalaallit Danmarkimiittut sullinneqarnerisa qanoq pitsanngorsarneqarsinnaaneranik innersuussuteqartussamik, suleqatigiissitamik pilersitsivoq.
Suleqatigiissitap taassuma sulinini qaammatit arlallit matuma siornagulli naammassivaa, qanorli suliaminik inerniliisimanersoq Ilagiinnut ministereqarfiup ilisimatitsissutigerusunngilaa.
