Danmarkimi killilersuinerit ilaat ataasinngorpat qasukkaamineqassasut
![](/sites/default/files/styles/image_934x467/public/article_images/20201209-122120-l_68mb.jpg?itok=C6pjR2I5)
Danmarkimi inuit ataasinngorpat marsip aallaqqaataani pisiniarfinnut minnernut niuerniarsinnaanngoqqillutillu sunngiffimmi silami sammisassaqartitsinerni peqataaqqissinnaanngussapput.
Danskit inatsiseqarnermut ministeriat, Nick Hækkerup (S), tusagassiortunik pingasunngornermi katersortitsinermi taama ilisimatitsivoq.
Niuertarfeqarfissuarni pisiniarfiit minillugit pisiniarfiit 5.000 kvadratmeterit tungaannut angitigisut ataasinngorpat ammaqqissasut, danskit naalakkersuisui taakkulu partiit ikorfartortigisaat aalajangerput.
Danmarkimilu timersornermik sunngiffimmilu silami sammisassaqartitsinerni peqataasut ataasinngornermiit 25-t tungaannut amerlatigisinnaalissapput.
Jyllandip avannarpasissortaani kangisissuanilu tunngavisumik atuarfinni atuartut soraarummeertussat ilinniartullu sapaatit akunnera allortarlugu atuariarsinnaanngussapput, taakkuli coronamut sapaatit akunneranut marloriarlutik misissortissimanissaat piumasaqaataavoq.
Bornholmimili killilersuinernik qasukkaaminerusoqassaaq. Tamaani pisiniarfiit inunnit qanermut assiaqutilinnit coronamillu tunillanneqarsimannginnermut uppernarsaatilinnit niuerniarfigineqarsinnaalissapput, niuerniartullu coronamik tunillanneqarsimannginnermut uppernarsaataat nalunaaquttap akunneri 72-init pisoqaaneroqqusaanngillat. Meeqqallu atuarfiit ilinniarfiillu tamarmik ammaqqissinnaapput, inuillu katersuunnermi tallimanit maanna amerlaneroqqusaasimanngitsut amerlanerpaamik quliusinnaalissapput.
Danmarkip sinnerani killilersuinerit apriilip ulluisa tallimaata tungaanut atuupput - tassa inuit katersuunnermi tallimanit amerlaneroqqusaanatik meeqqallu atuarfianni 0. klassip 4. klassellu akornanni atuartut taamaallaat atuariartoqqusaasut.