Danmarkimi juulli ukiortaarlu: Inuit amerlanerpaamik qulit qerlutuutoqatigiillutillu qummoroortaqatigiissinnaasut
Danmarkimi juulli ukiortaarlu 2020-mi allarpassuit assigalugit nalinginnaasumit allaanerungaatsiassaaq.
Danskimmi naalakkersuisuisa peqqissutsimut oqartussaasuisalu inuit nalliuttuni amerlanerpaamik quliunissaat innersuussutigaat.
Tamanna ministeriunerup, Mette Frederiksenip (S) tusagassiortunik katersortitsinermi nunatta nalunaaqutaa naapertorlugu ataasinngornermi ullaakkut ilaatigut oqaatigaa.
AAMMA ATUARUK Danmarkimi corona: Nunap annerpaartaa matulersoq
- Juullip unnuanut atatillugu ilaquttat qaniginerpaasat immaqa qanittumi takoqqamminngikkaluarigut taakku kisiisa takusinnaassagigut Peqqissutsimut aqutsisoqarfiup innersuussutigaa. Tassa inunnik qulinit amerlanerusunik juullisioqateqannginnissarput suli kaammattuutaavoq, Mette Frederiksen katersortitsinermi oqarpoq.
Nalliuttut nalaanni inuit amerlassusaannut killiliineq tunillaassuuttoqaratarsinnaanissaanut atatillugu 2021-mi aallartilluarsinnaanissatsinnut qulakkeerutaassasoq, ministeriunerup erseqqissaatigaa.
- Juullikkunni sulinngiffeqarnitsinni tunillaassuuttoqarnissaa qaffasikkuni taava nakkutigisinnaajunnaaratarsinnaavarput, tunillaassuunnerlu januaarimi februaarimilu unitsikkuminaalleratarsinnaalluni. Taamaattoqassanngilarlu.
Tamat orniguffigisinnaasaanni inuit qulinit amerlanerusut katersuunnissaannut inerteqquteqarneq 2021-mi januaarip ulluisa pingajuannut atuukkaluartoq 2021-mi februaarip ulluisa 28-annut sivitsorneqarpoq.
Kommunit 38-t matusut
Tamatuma sanitigut Danmarkimi kommunit 38-t pingasunngornermi ilaatigut matussapput. Matumani København, Odense Aarhusilu ilaatigut ilaapput.
Taakkunani ilaatigut neriniartarfiit, imerniartarfiit, filmertarfiit, isiginnaartitsisarfiillu atuisartunik isertitsissanngillat. Tamanna timersortarfinnut tamanut aamma atuuppoq.
Angajoqqaallu meeqqatik 5. Klassimiit qummut atuartut aamma angerlarsimatiinnaqqissavaat. Tamatuma saniatigut inuusuttut atuarfiini, ilinniarnertuunngorniarfinni, inersimasut atuarfiini ilinniartut pingasunngornermit qarasaasiaq atorlugu atuartinneqalissapput.
Ulluuneranili paaqqinniffiit nukarlernilu 4. klassit tikillugit atuarfiit ammaannassapput.
AAMMA ATUARUK Coronap ilaqutariit juullisioriartinniarunnaarai: Angajoqqaakka qangali takuagut
Ilaanik matusineq 2021-mi januaarip ulluisa pingajuat ilanngullugu atuutissaaq.
Aammattaaq pisortat suliffeqarfiini sulisut qassiiusut februaarip ulluisa 28-ata tungaanut angerlarsimaffimminnit sulileqqissapput.
Taama nalunaaruteqarneq COVID-19-imik tunillatsissimasut amerlassusaasa ullormut 2100-nit amerlanerusartut novembarip qiteqqunnerannit amerlangaatsiarnerannik pissuteqarpoq.
Danmarkimi COVID-19-imik tunillatsissimallutik napparsimmavimmi uninngasut katillugit 302-upput.
