Danmarkimi corona: Nunap annerpaartaa matulersoq
Danskit amerlasuut angerlarsimaannaaqqittussanngorput.
Danmarkimimi coronavirusip tuniluunnera kigaallatsinniarlugu killilersuinerit nutaat ministeriunerup Mette Frederiksenip ullumi nunatta nalunaaqutaa malillugu arfineq pingasunut saqqummiutissavai.
Danmarkimi kommunit 38-it matuneqarnissaat sapaammi unnukkut Facebookikkut videoliorluni nalunaarutigaa. Kommunit københavnemiittut, Odensemiittut Aarhuusimiittullu pineqarput.
Kommunini 38-ini neriniartarfiit, imerniartarfiit, filmertarfiit isiginnaartitsisarfiillu matuneqassasut, TV2 allappoq.
AAMMA ATUARUK Coronap ilaqutariit juullisioriartinniarunnaarai: Angajoqqaakka qangali takuagut
Taakku saniatigut 5. klassiniit qummut atuartut angerlartinneqassapput, pisortallu suliffeqarfiutai arlallit aamma angerlarlutik sulitinneqassasut, TV2 allappoq.
- Jullertinnagu coronavirusip tuniluunnera iliuuseqarfigisariaqarparput. Tamannalu tamatsinnut piumasaqarfiungaatsiassaaq, Mette Frederiksen Facebookimi oqarpoq.
Danmarkimi COVID-19-imik tunillatsissimasut novembarimiilli amerliartuinnarnerat kingunerisaanik taama aalajangertoqarpoq, novembarimmi qiteqqunnerani ullup ataatsip ingerlanerani inuit 2.100-t tunillatsissimasutut nalunaarutigineqarput.
Danmarkimi covid-19-imik tunillatsissimallutik napparsimmavinni uninngasut katillugit 302-jupput.
Nunatsinni COVID-19-imik tunillatsissimasut katillugit 18-iupput, maannali tamarmik peqqisseqqinnikuupput.
Killilersuineq qaqugu tungaanut atuutissanersoq suli ullulerneqanngilaq.
Coronalli tuniluutsinnaveersaarniarlugu juullip ukiortaallu akornanni qanoq iliortoqassanersoq, Mette Frederiksenip ullumi saqqummiutissavat.