Danmarkimi innersuussutit: Meterimik ataatsimik qanillisinnaanissaq naammappoq

Inuit imminnut meterimik ataatsimik amerlanertigut qanillisinnaanissaat naammaappoq.

Danmarkimi Peqqissutsimut Aqutsisoqarfiup innersuussutai sapaammi saqqummiunneqartut taama nipeqarput.

Coronavirusip tuniluutilinnginnissaa pillugu inuit minnerpaamik meterinik marlunnik qanillisinnaanissaat maannamut atuukkaluarpoq, maannali tamanna affaannanngortinneqarluni.

Pissutsinili aalajangersimasuni meterinik marlunnik imminnut ungasitsiginissaq suli atuuppoq.

Quersornermit, qisernermit tangajornermiilluunniit tuniluuttoqarsinnaanissaa aarleqqqutigineqarpat ikinnerpaamik meterinik marlunnik imminnut ungasitsiginissaq innersuussutaavoq.

Utoqqaat Illuinut pulaarnermi tamanna aamma atuuppoq, timersornermillu aaqqissuussanut atuulluni.

AAMMA ATUARUK Mette Frederiksen: Ataasinngorpamiit ammaqqikkiartornerulersinnaavugut

Nunani allani misilittakkat aallaavigalugit taama naliliisoqartoq, Peqqissutsimut Aqutsisoqarfiup pisortaata Søren Brostrømip oqaatigaa.

- Nunanit allanit isumassarsiniartarpugut, inuillu imminnut qanoq ungasitsigisarnissaannut nalileeqqinnitsinnut tamanna tunuliaqutaavoq, Søren Brostrøm oqarpoq.

Inuit imminnut ikinnerpaamik meterimik ataatsimik ungasitsigisarnissaat, Naalagaaffiit Peqatigiit peqqissuunissaq pillugu suleqatigiiffiata WHO-p innersuussutigaa.

Eqqiluisaarnissarli pingaarnerpaajuassasoq Søren Brostrømip erseqqqissaatigaa.

- Inuiaqatigiinni eqqiluisaarnissaq tamatsinnut pingaarnerpaavoq. Qanillinaveersaarnissamut naleqqiullugu tamanna pingaarneruvoq, Søren Brostrøm oqarpoq.