Danmarkimi ilinniartitsisut suliartoqqusaajunnarnissaasa kalaallit aamma eqqorsinnaavai

Ilinniartitsitsisut suliartoqqusaajunnaartussanngornerat inuusuttuaqqat nunatsinneersut maanna Danmarkimi efterskolertut ilaannut eqquisussanngorpoq. Ilinniartitaanermut Naalakkersuisoqarfimmiit oqarpput, pissutsit qanoq eqquisinnaanerat pillugu tusarlerneqarnissaq Naalakkersuisoqarfimmiit maanna utaqqimaarneqartoq.

Ilinniartitaanermut Naalakkersuisoqarfiup Danmarkimi efterskolit peqatigiiffiannut attaveqarsimavoq, tassanngaanniillu ilisimatitsissutigineqarsimavoq efterskolit 220-iusut akornanni 67-it suliartoqqusiunnaarnermit eqqugaasussanngitsut. Danmarkimi ilinniartitsisut suliartoqqusaajunnaartussanngornerat ullumi qularnaallivoq tappavani ilinniartitsisut kattuffiata - naalgaaffiullu - akornanni isumaqatigiinniarnerit angusaqarfiunngitsoormata.

Ilinniartitsisut suliartoqqusaajunnaartussaajunnarpata efterskolit ilaat eqqugaaussaanngillat, kisiannili efterskolit sorliit ilinniartitsisui suliartoqqusaajunnaartussaanersut Ilinniartitaanermut naalakkersuisoqarfimmi Ilinniartitaanermut inspektørip, Kaali Olsenip, naluaa:

- Ilimagineqartoq tassaavoq, efterskolit amerlanerpaat upalungaarsimassasut, matunnginnissaq siunerparalugu.

Ilinniartitsisut suliartoqqusaajunnaartussanngornerannut ilaatigut pissutaavoq naalagaaffiup ilinniartitsitsisullu kattuffiata ilaatigut piffissat suliffiusartussat pillugit isumaqatigiissutissaq assortuussutigimmassuk. Isumaqatigiissut taassuma imaraa ilinniartitsitsisut qanoq sivisutigisumik atuartitsisassanersut - atuartitsinissaminnullu piareersarnerminnut piffissaq qanoq sivisutigisoq atortassaneraat.

- Isumaqatigiinniarnernut qanoq naammassineqartussatut siumoortumik aalajangiiffigineqareersimasumi siornatigut peqataaneqanngisaannarpunga. Isumaqatigiinniartoqanngilaq. taama oqarpoq Danmarkimi ilinniartitsisut kattuffianni - Danmarks Lærerforening-imi - siulittaasoq - danskit aningaasaliisarnermut ministeriat,  Bjarne Corydon, isumaqatigiinniaqatigereerlugu.

Ilinniartitsisut suliartoqqusaajunnaartussanngornerat ilinniartitsisut 17.000-t suliartoqqusaajunnaarnerannik kinguneqassaaq Danmarkimilu atuartut 281.000-t atuartitaanerat eqqugaassalluni. Eqqugaasussanut ilaapput inuusuttuaqqat 240-t nunatsinniit Danmarkimut efterskoleriartorlutik maanna Danmarkimiittut.

Efterskoli nunatsinneersumik ataatsimik - arlalinnilluunniit - atuartuutilik upalungaarsimaniarluni piareersaateqarsimannginnini pissutigalugu matusariaqalissappat, taava angajoqqaat siullermik efterskolimut attaveqartariaqassapput. Tamatumali saniatigut allatut iliortoqarsinnaanngilaq, kisianni tassa atuartoq ilaqutariinnut Danmarkimi atuartuunermi nalaani attaveqarfigisaanut ingerlatinneqartariaqassaaq. Danmarkimi efterskolertut nunatsinneersut tamarmik ilaqutariinnik Danmarkimi saaffigisartagassaminnik attaveqarfissaqarput.

Ilinniartitsitsisut suliartoqqusaannginnerat sivitsuuttuussappat atuartut nunatsinneersut qanoq pineqassanersut Namminersorlutik Oqartussat isumaliutigiumaarpaat.

- Taava angerlartissanerlugit eqqarsaatigisariaqalerissavarput. Tassami ilaqutariit attaveqaataasut atuartoq aalajangersimasumik najugaqartitarisallugu neriorsuinikuunngillat, Ilinniartitaanermut Naalakkersuisoqarfiup pisortaa, Mikael Kristensen, oqarpoq.

Taamatut pisoqarsinnaanera aningaasaliissutini sillimmartaarfigineqarsimanngitsoq, Naalakkersuisoqarfimmi pisortap ilanngullugu oqaatigaa. Tassamigooq atuartut ikerinnakkut nunatsinnukartinneqarnissaannut aningaasaliissuteqartoqarnikuunngimmat.

- Tassalu angerlarpata Danmarkimut aallarteqqinnissaanut aningaasaliisoqarnikuunngilaq, qanoq kingornatigut ilioorqassanersoq politikikkut isummerfigineqartariaqassaaq, Mikael Kristiansen oqarpoq.

Ilinniartitaanermut Naalakkersuisoqarfimmi pisortap, Mikael Kristensen-ip naatsorsuutigaa efterskolini atuartut sorliit iliniartitsitsisut suliartoqqussaajunnaanerannit eqqugaajumaarnersut poorskernissaa sioqqullugu oqaatigisinnaalissagitsik.