Danskit coronavirusimik tunillatsissimallutik toqusut amerliartorput. Nappaammik toqquteqartut sisamanngornermi 123-nngorput, Statens Serum Institut paasissutissiivoq. Taakku pingasunngornermi naatsorsuinermut sanilliullugit 19-inik amerlanerupput.Assi: Ida Guldbæk Arentsen/Ritzau Scanpix

Danmarkimi coronavirusimik toqquteqartut 123-nngortut

Danmarkimi coronavirusimik tunillatsissimallutik toqusut amerliartorneranni napparsimmavimmi uninngasut sapaatip-akunnerani matumani amerliartunngillat.

Danskit coronavirusimik tunillatsissimallutik toqusut amerliartorput. Nappaammik toqquteqartut sisamanngornermi 123-nngorput, Statens Serum Institut paasissutissiivoq. Taakku pingasunngornermi naatsorsuinermut sanilliullugit 19-inik amerlanerupput.

Naalli coronamik tunillatsissimagaluartut tamanna toqqutaasimasariaqanngilaq. Napparsimmavimmi uninngasut ilarpassui allanik pinartunik nappaateqarsimapput.

Taakku coronavirusimik tunillatsinnerminnit ullut 60-it iluanni toqugunik coronavirusimik toqquteqartunik naatsorsuinermut ilaatinneqartarput.

Danskit toqusut amerliartornerat ilutigalugu Danmarkimi napparsimmavinni uninngasut ikinnerupput. Tassa 535-nit 525-nut ikilipput.

AAMMA ATUARUK Danmarkimi coronavirusimik tunillatsissimallutik toqusut 100-init amerlanerulersut

Napparsimmavimmili peruluttut uninngavianniitinneqartut 146-nit 153-inut amerlipput.

Taakkunannga 138-t perulungaaramik anersaartuummik atortoqartinneqartariaqarput. Pingasunngornermilu 129-usunit amerlanerullutik.

Taamaalilluni unitsinneqartut amerliartorunnaaraluarlutik peruluttut uninngavianniittut anersaartuuteqartariaqartullu amerlipput.

Danskit naalakkersuisuisa coronamik tuniluunnerup killilersimaarniarneranni killilersuinitik qassiiusut poorskip kingorna atorunnaarsikkiartulissagaat, ministeriunerup, Mette Frederiksenip (S) sapaatip-akunnerani matumani siusinnerusumi oqaatigaa.

Tamannali pissappat coronavirusimut atatillugu kisitsisit allanngorannginnissaat pisariaqarpoq.

AAMMA ATUARUK Mette Frederiksenip Danmarki poorskip kingorna immaqa ammaqqissaneraraa

Ammaaqqinneq qanoq ingerlanneqassanersoq naalakkersuisut suli pilersaarusiunngilaat, atorunnaarsitsiartuaarnertulli pissasoq, Mette Frederiksenip oqaatigaa.

Maannamut pisortat suliffeqarfii – matumani atuarfeqarfiit, paaqqinniffiillu ilanngullugit apriilip 13-iata tungaanut matoqqatinneqarput.

Ullormut tassunga matoqqatitsineq pisiniarfippassuarnut aamma matoqqatinneqartunut atuuppoq.

Matumani pisiniarfissuit, timigissartarfiit, neriniartarfiit, nujaleriviit kakiuisarfiillu ilaapput.

/ritzau/

Isummersuutit