Mette Frederiksenip Danmarki poorskip kingorna immaqa ammaqqissaneraraa
Danmarki poorskip kingorna ammariartoqqissappat innuttaasut paarlakaajaallutik sulinissartik atuarnissartillu piareersimaffigissavaat.
Danmarkip ministeriunera Mette Frederiksen (S) taama nalunaaruteqarpoq. Taassuma Danmarki poorskip kingorna immaqa ammaqqissasoq ataasinngornermi nalunaarutigaa.
Taamaattoqassappat Danmarki ammariartorlunilu innuttaasut paarlakaajaallutik sulillutillu atuassapput. Inuttaa tusagassiortunik katersortitsinermi taama oqarpoq.
Inuppassuit ataatsikkut angallannissaat ingalassimaniarlugu paarlakaajaalluni sulisoqartassasoq
Inuppassuit ataatsikkut soorlu busserlutik qimuttuitsorlutilluunniit angallannissaasa ingalassimanissaa qulakkeerniarlugu, innuttaasut paarlakaajaallutik sulissapput atuassallutilluunniit.
Maannamut killilersuinerpassuarnik tamanik poorskip kingorna ataatsikkut atorunnaarsitsisoqarnissaa neriorsuutigineqanngilaq. Taakkua apriilip ulluisa 13-iata tungaanut suli atuukkallarput.
Ammaaneq sukaterinermut allanngortinneqarsinnaasoq
Coronavirusip tuniluunnera pakkersimaarneqarluarpoq, tamannali allanngussappat paarlattuanik pisoqarsinnaasoq, Danmarkimi ministeriunerup oqaatigaa.
- Taama pisoqarsinnaavoq ikioqatigiinngikkutta immitsinnullu qanillattornaveersaanngikkutta tunillanneqarsimasullu amerleriapiloorpata.
- Danmarkimi innuttaasut naapillutillu katersuuttarpata Danmarki poorskip kingorna ammaqqissinnaanngilarput. Paarlattuanilli sakkortunerusumik sukatereqqittariaqassaagut, Mette Frederiksen tusagassiortunik katersortitsinermi oqarpoq.