Nunap immikkoortuani illoqarfiit pingaarnersaanni nunap immikkoortuinit tallimanit napparsimmavimmi uningasoqarnerpaavoq. Tassani nuna tamakkerlugu uninngasunit 535-nit 260-iupput.Assi: Ida Guldbæk Arentsen/Ritzau Scanpix

Danmarkimi coronavirusimik tunillatsissimallutik toqusut 100-init amerlanerulersut

Danmarkimi coronamik tunillatsissimasut 3092-inngorsimasut pingasunngornermi uppernarsarneqartoq, Statens Serum Institut paasissutissiivoq.

Danmarkimi inunnit coronavirusimik tunillatsissimasunit 100-init amerlanerusut maanna toqupput.

Coronamik tunillatsissimasut allat 14-it toqusutut aamma nalunaarutigineqarput.

Taamaalilluni toqusut maanna katillugit 104-lerput, Statens Serum Institut pingasunngornermi paasissutissiivoq. Naalli coronamik tunillatsissimagaluartut tamanna toqqutaasimasariaqanngilaq.

Tunillatsissimasutut nalunaarsorneqartut ullup ataatsip ingerlanerani aamma amerlipput. Taakku maanna 3092-iupput. Marlunngornermilu kisitsisinit 277-inik amerlanerullutik.

Tunillatsissimagaluartulli nalunaarsuinermi ilaanngitsut amerlanerungaatsiarnissaat ilisimagineqartariaqarpoq, ersiuteqartummi tamarmik misissorneqartanngillat. Danmarkimi inuit maanna 26.776-it coronavirusimik tunillatsissimanersut misissorneqareerput.

Misissorneqartut tunillatsissimasutullu uppernarsarneqartut amerlassusaat tunngavigigaanni misissorneqartut quliugaangata ataaseq tunillatsissimasarpoq.

AAMMA ATUARUK Danskit coronavirusimik tunillatsissimallutik toqusut 13-inik amerlisut

Tunillatsissimasutut paasineqartut angutaanerupput. Tunillatsissimasunit paasineqartunit 3092-init 1632-t angutaapput. Tamanna procentinngorlugu 52 procentiuvoq.

Coronamik napparsimanertik pissutigalugu napparsimmavimmi uninngasut pingasunngornermi 535-upput. Taakkunannga 146-t – tassa sisamararterutaat sinnerlugit peruluttut uninngavianniillutik. 146-nit 129-t peqqinngingaaramik anersaartuummik atortulerneqartariaqarput.

Nunap immikkoortuani illoqarfiit pingaarnersaanni nunap immikkoortuinit tallimanit napparsimmavimmi uningasoqarnerpaavoq. Tassani nuna tamakkerlugu uninngasunit 535-nit 260-iupput.

Nunat ilaanni inuit coronavirusimik tunillatsissimanermi kingorna peqqisseqqittut ingerlaavartumik pisortatigut nalunaarutigineqartarput.

Danmarkimili taakkununnga suli nalunaarsuisoqanngilaq. Statens Serum Institutilli nalunaarsuineq siulleq piffissami qanittumi piareernissaa naatsorsuutigaa.

AAMMA ATUARUK Mette Frederiksenip Danmarki poorskip kingorna immaqa ammaqqissaneraraa

Danmarkimi coronavirusip atugaanerata ineriartornerata malitsigisaanik oqartussat naalakkersuisullu mianersortumik neriulluaateqarput.

Danmarkimi coronavirusimik napparsimalersut sukkavallaanngitsumik amerliartuinnassappata Danmarkip nakkutigisaasumik ammariartuaarnissaa oqallisigineqalersinnaasoq ministeriunerup, Mette Frederiksenip (S) ataasinngornermi oqaatigaa.

Taassumalu poorskip kingorna ammaasoqaqqissinnaassagunarnerarlugu.

/ritzau/

Isummersuutit