Danmarkimi coronamik toqquteqartut 400-it sinneqalersut

Danmarkimi coronavirusimik tunillatsissimallutik toqusut 403-usut, Statens Serum Institut paasissutissiivoq.

Taakku sisamanngornermit qulingiluanik amerlanerupput.

Coronamilli tunillatsissimallutik toqusut ilumut nappaat taanna toqqutigineraat qularnarpoq. Coronamik tunillatsissimasutut paasineqarnermi kingorna ullut 60-inngortinnagit toqusut naatsorsuinermut ilaatinneqartarput.

Napparsimmavimmut unitsinneqarsimasut 320-nngorlutik ataatsimik amerlanerulerput.

Peruluttut uninngavianniittut 69-iusut, sisamanngornermit tallimanik ikinnerupput. 58-it anersaartuuteqartinneqarput – sisamanngornermiillu pingasunik ikinnerullutik.

Coronavirusimik Danmarkimi tunillatsissimasut tallimanngornermi 8210-upput. Amerlanerungaatsiartulli tunillatsissimanissaat ilimagineqarpoq.

AAMMA ATUARUK Danmarkimi tunillatsissimasunik napparsimmavimmut unitsitsisukinnerusoq: Toqusut 384-inngortut

Danmarkimi tunillatsissimasut nappaammillu qaangiisimasut 5526-upput.

Oqartussat coronamik tunillatsissimasutut peqqisseqqittunik taagunngilaat. Nappaammik qaangiisimaneq isumaqarpoq tunillatsissimanermit ullut 14-it ingerlaneranni napparsimmavimmut unitsinneqarsimanngitsut toqusimanngitsullu.

Danmarkilli ammariartuleqqinnera pissutigalugu tunillatsissittut amerlanerulernissaat ilimagineqarpoq.

Tunillatsissimasut amerlanerpaat illoqarfiit pingaarnersaanniipput.

Danmarkimi politiit tunillatsissimasut amerliartornerat allanngorarpallaannginnissaat pissutigalugu inuit kianneranni katerinnginnissaannik sisamanngornermi tallimanngornermilu mianersoqqussuteqariartorput.

Sumiiffiit Københavnimiittut Islands Brygge aamma Amager Strandpark inunnit kateriffigineqarlutik eqimattakkaani annikitsuni imminut qanippallaartut politiinit maluginiarneqarpoq.

AAMMA ATUARUK Tamaat isigalugu: Coronavirus pillugu killiffik

Inuit amerlanerungaatsiartut misissorneqartalernissaannut oqartussat iliuuseqaleruttorput – misissuinermi tuniluuttoqarnerata qanoq innera ersarinnerulersinneqarniarpoq.

Nunap immikkoortuini tupersuit napparneqarput, ersiuteqartullu tamarmik misissorneqarsinnaassallutik – aamma naak panertumik quersuunnaraluaraanni imaluunniit annikitsumik iluaallioraluaraanni.

Misissorneqartut amerlinerannik aamma isumaqarpoq.

Danmarkimi coronavirusimut misissorneqarsimasut maanna katillugit 125.329-upput.

Danmarkimi coronavirusimik tunillatsissimasunit toqusut 4,9 procentiupput.

/ritzau/