Danmarkimi tunillatsissimasunik napparsimmavimmut unitsitsisukinnerusoq: Toqusut 384-inngortut
Coronamik tunillatsissimanermi kinguneratigut toqusut 14-inik amerlisut, Statens Serum Institutip (SSI) pingasunngornermi kisitsisaataasa takutippaat. Danmarkimi coronamik tunillatsissimanermi kingunerisaanik toqusut katillugit 384-iupput.
Coronamilli tunillatsissimallutik toqusut ilumut nappaat taanna toqqutigineraat qularnarpoq. Coronamik tunillatsissimasutut paasineqarnermi kingorna ullut 60-inngortinnagit toqusut naatsorsuinermut ilaatinneqartarput.
Toqusunit 221-t nunap immikkoortuani illoqarfiit pingaarnersaanni najugaqartuupput. Sumiiffimmilu tassani tunillatsissimasutut nalunaarsorneqartut nunap immikkoortuani innuttaasoqassuseq aallaavigigaanni aamma amerlanerpaallutik.
Nunap immikkoortuani Sjællandimi coronamik toqquteqartut 68-iusut amerlanerpaat tulleraat, Midtjyllandimi 53-iullutik pingajuattut inissisimalluni.
AAMMA ATUARUK Danmarkimi coronavirusimik toqquteqartut maanna 370-iusut
Nunap immikkoortuani Syddanmarkimi coronamik toqquteqartut 24-t uppernarsarneqarput Nordjyllandimilu coronamik toqquteqartut ikinnerpaallutik 18-iupput.
Napparsimmavimmut unitsinneqarsimasut pingasunngornermi 11-nik ikilillutik 324-nngorput. Taakkunannga 80-it peqqingaaramik peruluttut uninngavianniipput, 68-illu anersaartuuteqartinneqarlutik. Peruluttut uninngavianniittut marlunngornermi 81-iupput 72-illu anersaartuuteqartinneqarlutik.
Danmarkimi coronavirusimik tunillatsissimasutut uppernarsarneqartut katillugit 7912-iusut SSI-mit pingasunngornermi ullaakkut kisitsisit takutippaat.
Ersiuteqartut tamarmik misissorneqartannginnerat pissutigalugu tunillatsissimasutut ilisimanertut 30-it 70-eriaataannik amerlanerusinnaasut SSI-p siusinnerusukkut nalilernikuuaa.
Coronavirusimik ersiuteqartut tamarmik misissorneqartalissasut, peqqinnissamut ministerip tusagassiortunik ataasinngornermi katersortitsinermi paasissutissiissutigaa. Tamanna piffissami sivitsortumi noqqaassutigineqarpoq, maannalu taamaaliortoqarsinnaalersoq, ministerip oqaatigaa.
Inuit 8000-it missaanniittut ullup ataatsip ingerlanerani misissorneqarnerminnik akissutersiffigineqartut SSI-mit pingasunngornermi ullaakkut kisitsisit takutippaat. Danmarkimi coronavirusimik tuniluuttoqalerneranit aatsaat taama amerlatigut ullormut misissorneqarput.
AAMMA ATUARUK Tamaat isigalugu: Coronavirus pillugu killiffik
Coronavirusimik tunillatsissimasutut uppernarsarneqarsimasunit 5000-it sinnerlugit timiminni aattortinneqarunnaarsimapput. Tassa 5087-it tunillatsinnerminnik qaangiisimasut, SSI-mit kisitsisit takutippaat.
Nappaammik Covid-19-imik tunillatsissimasutut uppernarsarneqarnermit ullut 14-it qaangiunneranni toqusimanngitsut napparsimmavimmullu unitsinneqarsimanngitsut qaangiisutut nalunaarneqartarput.
Nunarsuaq tamakkerlugu inuit 2,5 millionit sinnerlugit tunillatsissimapput. Taakku pingasorarterutaasa missaat USA-miipput.
Nunarsuaq tamakkerlugu coronamik tunillatsissimanermi kingorna toqusutut nalunaarutigineqartut 178.000-iupput. Tunillatsissimasunit 700.000-it missaanniittut qaangiisimasut, Johns Hopkins Universitymit kisitsinermi allassimavoq.
/ritzau/