Danmarkip illersornissamut tunngasuni EU-mi oqartussaaqataalernissaa pillugu innuttaasut pingasunngornermi taasitinneqarmata amerlanerussuteqarluartut akuersissutigaat.

Danmarki illersornissamut tunngasuni EU-mi oqartussaaqataalertoq

Danmarkip illersornissamut tunngasuni EU-mi oqartussaaqataalernissaa pillugu innuttaasut pingasunngornermi taasitinneqarmata amerlanerussuteqarluartut akuersissutigaat.

Danmarkip illersornissamut tunngasuni EU-mi oqartussaaqataalernissaa pillugu innuttaasut pingasunngornermi taasitinneqarmata 66,9 procentit akuersipput.

Innuttaasut pingasunngornermi taasitinneqareersullu tamanna paasinarsivoq.

Danmark EU-p sillimaniarnermut illersornissamullu suleqatigiissuteqarnerani taamaalilluni tamakkiissumik peqataasinnaalerpoq, assersuutigalugulu nunani allani sumi qaqugulu sakkutuuliisoqarnissaa EU-p aalajangerpagu, Danmark aamma aalajangeeqataasinnaalerpoq.

Akuersineq Kalaallit Nunaannut Savalimmiunullu toqqaannartumik sunniuteqarnavianngilaq.

Europamili nunat allat illersornissamut tunngasuni suleqatigineqarnerulerpata, Naalagaaffeqatigiit nunat Europameersut Issittumik soqutiginninnerannut sunniuteqaqataanerulersinnaassasut, illersornissamut ilisimatusarfimmi Center for Arktiske Sikkerhedsstudierimeersoq Henrik Gram Pedersen isumaqarpoq.

AAMMA ATUARUK Danmark illersornissamut tunngasuni EU-mi oqartussaaqataalissappat Issittoq sammineqarnerulersinnaasoq

Innuttaasut taasitinneqarneranni inernerit danskit ministeriunerata, Mette Frederiksenip, pingasunngornermi unnukkut nuannaarutigaa.

- Europa pillugu politikkimi unnuk mannamiit aatsaat taamma ataqatigiitsigilerpugut. Tamanna nunarsuarmi taama avissaartuuffiutigisumi pingaaruteqarpoq, taanna oqarpoq.

Danmark EU-mi immikkoortuni pingasuni allani suli oqartussaaqataaffeqanngilaq. Tassa EU-mi aningaasaq Euro pillugu, eqqartuussisoqarnermut tunngasuni immikkoortut arlallit EU-milu innuttaassuseqarnermut tunngasuni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl